काठमाडौं । राष्ट्रिय स्वतन्त्र पार्टी (रास्वपा) का सभापति रवि लामिछाने सोमबार लामो समयपछि पार्टी कार्यालय फर्किएका छन् । सहकारी ठगी प्रकरणमा मुछिएपछि प्रहरी हिरासतमा परेका उनी धरौटीमा रिहा भएपछि पहिलो पटक बनस्थलीस्थित पार्टी कार्यालय पुगेका हुन् ।
गत कात्तिक २ गते पार्टी कार्यालयबाटै पक्राउ परेका लामिछाने झन्डै ६ महिनापछि पुनः कार्यालय फर्किएका हुन् । पक्राउपछि उनी कास्की लगिएका थिए । पार्टी कार्यालय पुगेपछि उनले ठूला दलहरूप्रति आक्रोश पोख्दै सरकारको आलोचना गरे । ‘माथि जति मुद्दा लगाउनुछ, लगाऊ, तर म अन्तिम सास रहुन्जेल लडिरहन्छु,’ उनले सम्बोधन गर्दै भने । लामिछानेले दुई-तिहाइको सरकारले आफूलाई जिउँदै छोड्नु नै आफ्नो विजय भएको बताए ।
उनले सरकारको षड्यन्त्र अझै जारी रहेको आरोप लगाए । ‘अदालतको आदेशको अपव्याख्या गरिएको छ । जुनसुकै परीक्षणका लागि तयार छु । दुई-तिहाइको सरकारले मलाई जिउँदै छोड्नु नै मेरो जित हो,’ उनले भने । साथै, लामिछानेले गणतन्त्र र लोकतन्त्रको नाममा लुटतन्त्र मच्चाइएको भन्दै यसको विरुद्ध आफू कहिल्यै पछि नहट्ने दाबी गरे ।
‘लोकतन्त्रको आडमा भइरहेको लुटतन्त्र सह्य छैन । म कुनै पनि शक्तिसँग लड्न तयार छु, तर अन्याय सहन सक्दिनँ,’ उनले भने । साथै, उनले वर्तमान राजनीतिक अवस्थाका कारण आफू विश्राममा बस्न नसकेको उल्लेख गरे । ‘मलाई केही समय विश्राम गर्न मन थियो, तर देशको परिस्थिति हेर्दा अब पछि हट्न सक्दिनँ,’ उनले थपे ।
सभापति लामिछानेले संसदमा प्रतिपक्षी दलहरूको भूमिकाप्रति पनि असन्तुष्टि व्यक्त गरे । ‘जनताको विश्वास बेचेर खान्न, सत्ताले सुन्नुपर्छ– रवि लामिछाने प्रधानमन्त्री पद अस्वीकार गरेर कैदी हुन तयार भएको मान्छे हो,’ उनले भने ।
२०७९ को आमनिर्वाचनपछि बनेको पुष्पकमल दाहाल ‘प्रचण्ड’ नेतृत्वको सरकारमा लामिछाने दुई पटक उपप्रधान एवं गृहमन्त्री बनेका थिए । उनले आगामी निर्वाचनका लागि उत्कृष्ट उम्मेदवार चयन गर्दै तयारी गर्नुपर्ने बताए । आफू उम्मेदवार नबन्ने तर अरूलाई अवसर दिने उनको भनाइ थियो । साथै, नेपाली कांग्रेस र नेकपा एमालेको नेतृत्वमा बनेको सरकार अब अप्रासंगिक भइसकेको उनले दाबी गरे ।
लामिछानेमाथि काठमाडौं, पोखरा, रुपन्देही, चितवन र वीरगञ्जमा सहकारी ठगीसम्बन्धी मुद्दा दायर छन्, जसका कारण उनी हाल चितवनबाट निलम्बित सांसद हुन् । उनी सबै स्थानका मुद्दामा धरौटीमा रिहा भइसकेका छन्, तर उनले अब पार्टी नेतृत्व बलियो बनाउने अठोट व्यक्त गरेका छन् ।
