काठमाडौं । सिटिजन्स बैंक इन्टरनेसनल लिमिटेडले आफ्ना ग्राहकहरूका लागि भर्चुअल क्रेडिट कार्ड सेवा ल्याएको छ । नेपाल राष्ट्र बैंकबाट ‘क’ वर्गको वाणिज्य बैंकको रूपमा इजाजत प्राप्त सिटिजन्स बैंकले डिजिटल भुक्तानीलाई प्रवर्द्धन गर्ने उद्देश्यले यो सेवा सुरु गरेको हो ।

बैंकले देशकै पहिलो भर्चुअल क्रेडिट कार्ड सार्वजनिक गरेको छ, जसले डिजिटल भुक्तानीलाई थप सहज र सुरक्षित बनाउनेछ । मोबाइल बैंकिङ प्रविधिमा निर्भर यो कार्डले प्रयोगकर्तालाई कुनै पनि भौतिक कार्ड बिना नै विभिन्न भुक्तानी गर्ने अवसर प्रदान गर्नेछ ।

यस भर्चुअल क्रेडिट कार्डको माध्यमबाट ग्राहकहरूले अनलाइन तथा अफलाइन दुबै स्थानमा क्यूआर कोड स्क्यान गरी भुक्तानी गर्न सक्नेछन्। विशेष गरी ‘फोन पे’ मा सूचीकृत मर्चेन्टहरूमा सहज रूपमा प्रयोग गर्न सकिने सुविधा उपलब्ध छ।

यस कार्डको प्रमुख फाइदामध्ये एक प्रारम्भिक ४५ दिनसम्म ब्याज नलाग्नु हो। अर्थात्, प्रयोगकर्ताले ४५ दिनभित्र खर्च गरिएको रकम भुक्तानी गर्दा कुनै अतिरिक्त ब्याज तिर्नु पर्ने छैन। साथै, मोबाइल बैंकिङ एपमार्फत नै कार्ड सक्रिय पार्न सकिने हुँदा कुनै छुट्टै प्लेटफर्म वा उपकरणको आवश्यकता पर्दैन।

सिटिजन्स बैंकका खाता भएका ग्राहकहरूले सिधै मोबाइल बैंकिङमार्फत कार्डका लागि आवेदन दिन सक्नेछन्। नयाँ ग्राहकहरूका लागि खाता खोलिसकेपछि आवेदन प्रक्रिया पूरा गरी दुई दिनभित्र क्रेडिट कार्ड उपलब्ध हुनेछ।

भर्चुअल क्रेडिट कार्ड प्राप्त गर्नका लागि ग्राहकले नियमित आम्दानीको स्रोत वा निश्चित सम्पत्ति प्रमाणित गर्नुपर्नेछ। साथै, मुद्दती निक्षेपको आधारमा पनि कार्ड लिन सकिन्छ। कार्डको अधिकतम सीमा २ लाख ५० हजार रूपैयाँ निर्धारण गरिएको छ, जसले उपभोक्ताहरूलाई ठूलो परिमाणको खरिदमा सहयोग पुर्‍याउनेछ।

कार्डको अर्को विशेषता भनेको कारोबार विवरण ‘लाइभ’ हेर्न सकिने सुविधा हो। अब ग्राहकले मासिक स्टेटमेन्ट कुर्नु नपरी कुनै पनि समयमा आफ्नो खर्च विवरण हेर्न सक्नेछन्। साथै, विभिन्न श्रेणीअनुसार खर्चको व्यवस्थापन गर्न समेत यो कार्ड उपयोगी हुनेछ।

प्रारम्भिक वर्षका लागि कार्ड सक्रिय गर्दा ५०० रूपैयाँ शुल्क लाग्नेछ भने प्रत्येक वर्ष नवीकरण गर्न पनि ५०० रूपैयाँ लाग्नेछ। यो कार्ड प्राप्त गर्न बैंकको वेबसाइट वा मोबाइल बैंकिङ एपमार्फत सिधै आवेदन दिन सकिन्छ। ग्राहकहरूले बैंकका शाखामा गएर पनि थप जानकारी लिन सक्नेछन्।

• थप बुझ्नुहोस्

भर्चुअल क्रेडिट कार्डको लागि आवश्यक योग्यता

यो सेवा लिनका लागि आवेदक नेपाली नागरिक हुनुका साथै १८ वर्ष पूरा भएको हुनुपर्छ। साथै, व्यवसाय, सेवा वा सम्पत्तिबाट स्थिर र नियमित आय भएका व्यक्ति योग्य मानिनेछन्।

नयाँ ग्राहकका लागि आवश्यक कागजातहरू

तलबआधारित कर्मचारीहरूका लागि

• भर्चुअल क्रेडिट कार्ड आवेदन फारम
• पासपोर्ट साइजको फोटो (२ प्रति)
• नागरिकता प्रमाणपत्र वा राहदानीको प्रतिलिपि
• हालको तलब खुल्ने सिफारिस पत्र वा प्रमाणपत्र
• पछिल्ला ६–१२ महिनाका बैंक स्टेटमेन्ट

व्यवसायिक आम्दानी आर्जन गर्नेहरूका लागि

• भर्चुअल क्रेडिट कार्ड आवेदन फारम
• पासपोर्ट साइजको फोटो (२ प्रति)
• नागरिकता प्रमाणपत्र वा राहदानीको प्रतिलिपि
• पछिल्ला २ वर्षको वित्तीय विवरण
• व्यवसाय दर्ता प्रमाणपत्र, स्थायी लेखा नम्बर (PAN), VAT प्रमाणपत्रको प्रतिलिपि
• पछिल्ला ६–१२ महिनाका बैंक स्टेटमेन्ट
• शेयर संरचना खुल्ने कागजात तथा आवश्यक कानुनी कागजातहरू

पहिले नै बैंकका ग्राहक रहेका व्यक्तिहरूका लागि

ऋण लिएका ग्राहकहरूका लागि:

• स्वीकृत ऋण रकमको २.५% वा अधिकतम रु. २,५०,००० सम्मको क्रेडिट सीमा

स्थायी निक्षेप (FD) खाता भएका ग्राहकहरूका लागि:

• एफडी रकमको ५०% वा अधिकतम रु. २,००,००० सम्मको क्रेडिट सीमा

पेरोल खाता भएका कर्मचारीहरूका लागि:

• खातामा जम्मा हुने नेट तलबको १.५ गुणासम्मको सीमा
• कम्तीमा ३ महिना तलब खातामा जम्मा हुनुपर्ने

विशेष ग्राहकहरू (प्रिभिलेज क्लाइन्ट) का लागि:

• अधिकतम रु. १,००,००० वा खाताको औसत मौज्दात रकमको १०% को सीमा

शुल्क तथा अन्य विवरणहरू

सिटिजन्स भर्चुअल क्रेडिट कार्डको शुल्क निम्नानुसार तोकिएको छः

पहिलो वर्ष निःशुल्क
ग्राहकहरूको सुविधाका लागि पहिलो वर्ष कार्ड निःशुल्क प्रदान गरिनेछ, तर दोस्रो वर्षदेखि बैंकको मानक शुल्क संरचना अनुसार शुल्क लाग्नेछ।

सहयोगको लागि सम्पर्क

यदि कार्ड लिन वा थप जानकारी चाहिएको छ भने सिटिजन्स बैंकको ग्राहक सेवा केन्द्रमा सम्पर्क गर्न सकिन्छ:
📞 हेल्पलाइन: १६६००१६६६६७
📞 सपोर्ट सेन्टर: ०१-५९७००६८