थाई चेम्बरका प्रतिनिधिसँग नेपाली महिला उद्यमीको छलफल

काठमाडौं । नेपाल उद्योग वाणिज्य महासंघअन्तर्गतको महिला उद्यमी विकास समितिको प्रतिनिधिमण्डलले थाइल्यान्डस्थित थाई चेम्बर अफ कमर्सका प्रतिनिधसँग बैंककमा व्यावसायिक भेटवार्ता गरेको छ । प्रतिनिधिमण्डलले थाई चेम्बर अफ कमर्सका उच्च पदाधिकारी तथा त्यहाँका उद्योगी, व्यवसायीसँग द्विपक्षीय लगानी अभिवृद्धिका विषयमा छलफल गरेको हो ।

उक्त टोलीमा महासंघका उपाध्यक्ष ज्योत्सना श्रेष्ठ, केन्द्रीय सदस्य नरेशलाल श्रेष्ठ, किशोर आचार्य, केन्द्रीय सदस्य तथा महिला उद्यमी विकास समितिका सभापति कमला श्रेष्ठ र व्यापार तथा निकासी प्रवद्र्धन विकास समितिका सदस्य निराजन चलाउनेलगायत व्यक्ति सहभागी थिए ।

थाई चेम्बर अफ कर्मसको निमन्त्रणामा बैंकक पुगेको प्रतिनिधमण्डलले द्विपक्षीय भेटका अवसरमा नेपालमा लगानीको पर्याप्त सम्भावना रहेको उल्लेख गरेको थियो । टोलीले थाई उद्योगी, व्यवसायीलाई नेपालमा लगानीका निम्ति आग्रह गरेको थियो ।

यस्तै, नेपाली प्रतिनिधिमण्डलले नेपालमा आयोजना हुने अन्तर्राष्ट्रिय मेला, महोत्सवमा भाग लिन तथा अरू सहकार्यका क्षेत्र पहिचान गरी लगानी गर्न पनि थाई व्यवसायीलाई आग्रह गरेको थियो ।

नेपाली व्यवसायीलाई स्वागत गर्दै थाई चेम्बरका बोर्ड अफ ट्रेड बन्जरड चोल्भीजानले नेपाली महिला उद्यमीको क्षमता अभिवृद्धि र अरू सहकार्यका निम्ति आफूहरू सकारात्मक रहेको बताए ।