सँगै सुतेका साथीको मध्यरात हत्या

काठमाडाैं । मकवानपुरमा एक व्यक्तिले आफ्नै घरमा सुतिरहेका साथीको साबेलले हिर्काएर हत्या गरेका छन् । मनहरी गाउँपालिका-६ प्रतापुर लच्का घर भएका अम्मरबहादुर लोप्चनले ५० वर्षीय जीतबहादुर मोक्तानको हत्या गरेका हुन् ।

गए राति साढे एक बजेतिर अम्मरबहादुरले आफ्नै घरमा सुतिरहेका मोक्तानलाई एक्कासी साबेलले हानेको जिल्ला प्रहरी कार्यालय मकवानपुरले जनाएको छ । टाउको र खुट्टामा चोट लागेर गम्भीर घाइते मोक्तानको उपचारको क्रममा भरतपुर अस्पताल चितवनमा आज बिहान साढे ३ बजे मृत्यु भएको प्रहरी नायव उपरीक्षक श्यामु अर्यालले जानकारी दिए ।

मोक्तान र लोप्चनसँगसँगै निर्माण क्षेत्रमा मजदुरी गर्ने गरेको डिएसपी अर्यालले जानकारी दिए । उनीहरू दुवै जना प्रायजसो लोप्चनको घरमा सुत्ने गरेको पाइएको उनले जानकारी दिए । लोप्चनलाई प्रहरीले सावेलसहित नियन्त्रणमा लिएको छ । उनले सुतिरेका मोक्तानमाथि एक्कासी साबेल किन प्रहार गरे भन्ने विषयमा अनुसन्धान भइरहेको डिएसपी अर्यालले बताएका छन् ।