रुखले जोगायो २४ यात्रुको ज्यान

काठमाडौं । कास्कीको पोखरा महानगरपालिका-२२ शान्ति स्तुपा नजिकै बस दुर्घटना भएको छ । बिहीबार दिउँसो करिब साढे १२ बजेको समयमा पुम्दीकोटबाट छोरेपाटनतर्फ आउँदै गरेको नवयुग डान्स क्लब दाङको भ्रमण टोली बोकेको बस दुर्घटनामा परेको हो ।

रा१ख २१०६ नं.को मिनी बसका चालकले नियन्त्रण गुमाउँदा बस सडक छेउमा रहेको तिजुको रूखमा अड्किएको थियो । बसमा सात जना महिला र १७ जना पुरुष गरी २४ जना यात्रु सवार थिए । तीमध्ये दुईजना घाइते भएका छन् । घाइते भएका दाङको तुलसीपुर उपमहानगरपालिका–४ की १७ वर्षिया सन्ध्या रसाइली र १९ वर्षिया मनीषा रसाइलीलाई नमस्ते अस्पताल बिरौटा ल्याइएको छ ।

बसलाई क्रेनको सहायताले निकाल्ने प्रयास भइरहेको जिल्ला प्रहरी कार्यालय कास्कीले बताएको छ।