अवैध कल बाइपासमा संलग्न दुई जना पोखराबाट पक्राउ

काठमाडौं । गैरकानुनी रुपमा अन्तर्राष्ट्रिय आगमन कल बाइपास (भीओआईपी) सञ्चालन गरिरहेको अवस्थामा प्रहरीले दुई जनालाई पोखराबाट पक्राउ गरेको छ ।

नेपाल प्रहरीको केन्द्रीय अनुसन्धान ब्युरोको टोलीले पोखरा महानगपालिका–११ सिद्धेश्वर मार्गस्थित विशाल गौतमको तीन तले घरबाट कल बाइपासमा संलग्न दुई जनालाई पक्राउ गरेको हो । सीआईबीले जिल्ला प्रहरी कार्यालय पोखराको टोलीसँग मिलेर विशाल साह कलवारले भाडामा लिएर १२८ पोर्ट क्षमताको डिभाइसमा सिमकार्ड प्रयोग गरी कल बाइपास गरिरहेको अवस्थामा शुक्रबार उनीहरूलाई पक्राउ गरेको हो ।

प्रहरीले अवैध भीओआईपीमा प्रयोग गरिएका उपकरणहरू पनि बरामद गरेको छ । पक्राउ परेकाहरूमा पर्साको मधुवन गाउँपालिका–३ घर भई हाल पोखरा महानगरपालिका –११ बस्ने विशाल साह कलावर रहेछन् । त्यस्तै रुपन्देहीको लुम्बिनी नगपालिका ४ घर भई पोखरा महानगरपालिका–११ बस्ने २५ वर्षीय इमरान अहमद खान पनि रहेका छन् ।

बरामद सामान
१) भीओआईपी गेट्वे ६४ पोर्टको २ थान
२) वर्ल्डलिङ्क वाईफाई राउटर १ थान
३) प्रयोग भएको डिभाइस २ थान
४) एनसेलका प्रयोग नभएको सिम २०९ थान
५) सिम होल्डर कार्डसहित ३८५ थान
६) ब्लक भइसकेका सिम २८० थान
७) सिम होल्डर १३८ थान