निम्बस इन्टरनेशनलले इलेक्ट्रिक स्कूटर र साइकल भाडामा दिने

काठमाडौँ । निम्बस इन्टरनेशनल प्रा.लि.ले काठमाडौँ उपत्यकामा आफ्नो नवीनतम इलेक्ट्रिक स्कूटर र साइकल भाडामा दिने सेवा सुरु गरेको छ ।

कम्पनीले कुशल र पर्यावरणीय मैत्री यातायातको मागलाई पूरा गर्ने उद्देश्यले नवीनतम इलेक्ट्रिक स्कूटर र साइकल भाडामा दिने सेवा सुरु गरेको हो ।

यो सेवाले व्यक्ति र व्यवसायीहरू दुबैका लागि लागत प्रभावी विकल्प प्रदान गर्ने कम्पनीले जनाएको छ । कम्पनीका अनुसार इलेक्ट्रिक स्कूटरको दैनिक भाडा ७ सय र इलेक्ट्रिक साइकलको लागि १००–३०० को दरमा तोकिएको छ । निम्बस इन्टरनेशनलले पाठाओ र इनड्राइभ जस्ता खाना डेलिभरी र राइड–शेयरिङ सेवा प्रदान गर्ने प्रयोगकर्ताहरू लगायत विस्तृत प्रयोगकर्ताहरूलाई लक्षित गरेको उक्त सेवा सुरु गरेको हो ।

यस सेवाले यातायात खर्च घटाउन खोज्ने व्यक्तिहरूका लागि मात्र उपयोगी नभई पर्यावरणीय रूपमा सफा यात्राको प्रवर्द्धन गर्दै इन्धन खर्च घटाउँछ । आर्थिक फाइदाहरूलाई जोड दिँदै, निम्बस इन्टरनेशनलका एक प्रवक्ताले भने ‘हाम्रो सेवा थोरै लगानीमा बढी आम्दानी खोज्ने व्यक्तिहरूका लागि तयार पारिएको छ ।’