पर्यटनमन्त्री आलेविरुद्ध प्रहरीमा निवेदन, के छ निवेदनमा ?

काठमाडौँ । संस्कृति, पर्यटन तथा नागरिक उड्डयनमन्त्री प्रेमबहादुर आलेविरुद्ध निवेदन परेको छ । नेपाल एयरलाइन्सका कार्यकारी अध्यक्ष युवराज अधिकारीले मन्त्री आलेले धम्की दिएको भन्दै जिल्ला प्रशासन कार्यालय काठमाडौँ र जिल्ला प्रहरी परिसर टेकुमा निवेदन दिएका हुन् ।

निवेदक अधिकारीले दुवै कार्यालयमा आफैँ उपस्थित भएर बुझाएको निवेदनमा मन्त्री आलेले गोली हान्ने र कुटपिट गर्ने धम्की दिएको उल्लेख छ । पर्यटनमन्त्री आलेले नेपाल एयरलाइन्सका कार्यकारी अध्यक्ष अधिकारीमाथि हातपात गरेको घटना हिजो बाहिरिएको थियो ।

तर पर्यटनमन्त्रीको सचिवालयले मन्त्रालयमा यस्तो घटना नभएको दाबी गर्दै विज्ञप्ति निकालेको छ । यसअघि कामको सिलसिलामा भारत बस्ने जगत ओली नामका युवालाई तथानाम गाली गर्दै खुट्टा भाँचिदिने धम्की दिएर आले विवादमा तानिएका थिए ।