काठमाडौँ । गत कात्तिकदेखि बन्द टेलिभिजन कार्यक्रम ‘मुन्द्रेको कमेडी क्लब’ले पुनः निरन्तरता पाउने भएको छ । फुलन्देकी आमा अर्थात् उमेश राईसँग विवाद भएपछि कमेडी सो’ले पुनः निरन्तरता पाउने भएको हो ।

कार्यक्रम सञ्चालक जितु नेपाल ‘मुन्द्रे’ले सो’लाई चाँडै नयाँ ढाँचा र टिमसँग ल्याउने तयारी भइरहेको जानकारी दिए । ‘मुन्द्रेको कमेडी क्लब पुनः प्रसारण होस भन्ने धेरैको चाहना रहेकोले फेरि आफ्नो कर्म तिर लाग्दैछु । हिजोका केही कमीकमजोरीहरुलाई हटाउँदै नयाँ जोस जाँगर र उत्साह सहित आउन लागेका छु,’ उनले आइतबार बिहान सामाजिक सञ्जालमार्फत भनेका छन्, ‘केही नयाँ अनुहार, नयाँ सेटअप र मनोरञ्जनका नयाँ प्रयोग सहित,मेरो आदरणीय गुरु दिनेश डीसी दाइको निर्देशनमा तयार गरिने अबका भागहरू अवश्य हजुरहरूलाई मनोरञ्जन दिन सफल हुनेछ भन्ने विश्वास लिएका छु ।’

उनले क्लबमा सहभागी हुने नयाँ पात्र, प्रसारण हुने टेलिभिजन तथा मिति र समय चाँडै औपचारिक कार्यक्रममार्फत जानकारी दिएका पनि उल्लेख गरेका छन् । ‘क्लबमा सहभागी हुने नयाँ पात्रहरु,प्रसारण हुने टेलिभिजन, मिति र समय चाँडै नै एक कार्यक्रमका बिच सार्वजनिक गर्नेछौ । सबै आदरणीय दर्शकहरू बाट पाइरहेको माया साथ र हौसला निरन्तर मिल्नेछ भन्ने आशा लिएका छु । ‘मुन्द्रे’ केही आत्तिएला तर मात्तिने छैन । मुन्द्रेले धेरै हँसाउन न सक्ला तर रुवाउने छैन । मुन्द्रेले धेरै राम्रो गर्न न सक्ला तर न राम्रो गर्ने छैन,’ उनले अगाडि भनेका छन् ।