काठमाडौं । नेपाल पर्यटन वोर्डका प्रमुख कार्यकारी अधिकृत डा.धनन्जय रेग्मी निलम्बनमा परेका छन् । शुक्रबार बसेको पर्यटन बोर्डको बैठकले निलम्बन गरेर रेग्मीमाथि लागेको आरोप छानबिन प्रक्रिया अघि बढाउने निर्णय गरेको हो ।
पर्यटन मन्त्रालयका सचिव तथा बोर्डका अध्यक्ष महेश्वर न्यौपानेको अध्यक्षतामा बसेको बैठकले रेग्मीका काम कारवाहीमाथि छानविन गर्न उपाध्यक्ष चन्द्र रिजालको संयोजकत्वमा तीन सदस्यीय समिति गठन गरेको छ ।
रेग्मी निलम्बनमा परेसँगै वरिष्ठ निर्देशक नन्दिनी थापा लाहेलाई कायमुकायम सिइओको जिम्मेवारी तोकिएको छ । सीईओ रेग्मीले असोज २९ बेलायतबाट फर्किँदा भन्सारको छुट सुविधाभन्दा बढी मदिरा बोकेर ल्याएर थिए ।
भन्सारले विदेशबाट फर्किँदा एक व्यक्तिले १ लिटर (बोतल) मदिरा ल्याउन छुट दिएको छ । तर बेलायतबाट रेग्मीले ६ बोतल मदिरा ल्याएका थिए । यही बिषयमा विवाद भएपछि उनले भन्सारका कर्मचारीमाथि दुर्व्यवहार गरेका थिए ।
भन्सार विभागका कर्मचारी माथि हातपात गरेको भिडियो सार्वजनिक भएपछि संस्कृति, पर्यटन तथा नागरिक उडड्यन मन्त्री प्रेम आलेले स्पष्टीकरण सोधेको थियो ।
