लिभरपुलको शानदार जित, म्यानचेस्टर सिटीलाई अग्युरोको पेनाल्टीले जोगायो

काठमाडाैँ । इंग्लिस प्रिमियर लिग फुटबल अन्तर्गत बुधबार राति भएको खेलमा शानदार जित निकाल्दै लिभरपुल शीर्षस्थानमा कायम रहेको छ । घरेलु मैदानमा भएको खेलमा लिभरपुलले वाट्फोर्डमाथि ५–० को जित निकालेको हो ।

लिभरपुलको जितमा साडिओ माने र भर्जिल भान डेकले दुई दुई गोल गरे । यस्तै डिभोक ओरिगीले एक गोल गरेका हुन् ।
पहिलो हाफमा दुई गोल गरेको लिभरपुलले दोस्रो हाफमा थप तीन गोल गरेको हो ।

लिभरपुलका लागि मानेले नवौँ र २० औँ मिनेटमा गोल गरेका हुन् । यस्तै ओरिगीले ६६ औँ मिनेटमा गोल गरे । भान डिजेकले ७९ र ८२ औँ मिनेटमा गोल गर्दै लिभरपुलको ५–० को जित निश्चित गरेका हुन् । जितपछि शीर्षस्थानको लिभरपुलको २८ खेलबाट ६९ अंक भएको छ ।

बुधबार राति नै भएको खेलमा वेष्ट ह्याममाथि १–० को संघर्षपूर्ण जित निकालेको म्यानचेस्टर सिटी दोस्रो स्थानमा छ ।

घरेलु मैदानमा भएको खेलमा सिटीको जितमा ५९ औँ मिनेटमा पाएको पेनाल्टीमा सर्जियो अग्युरोले गोल गरे । जितपछि दोस्रो स्थानको सिटीको २८ खेलबाट ६८ अंक भएको छ ।