काठमाडौं । देशभर आएको अविरल वर्षाका कारण उत्पन्न प्रतिकूल परिस्थितिलाई मध्यनजर गर्दै सरकारले भोलि (आइतबार) र पर्सि (सोमबार) सार्वजनिक बिदा दिने निर्णय गरेको छ । गृह मन्त्रालयका अनुसार, अविरल वर्षाले निम्त्याएको जनजीवनको असहजतालाई दृष्टिगत गर्दै यो निर्णय गरिएको हो ।

राजमार्गहरूमा खसेको पहिरो र मौसम पूर्वानुमान महाशाखाले जारी गरेको उच्च सतर्कता (अलर्ट) लाई गम्भीरतापूर्वक लिँदै, आइतबारदेखि खुल्ने तय भएका सरकारी कार्यालयहरू पनि थप दुई दिन बन्द रहनेछन् । 

यसैबीच, गृह मन्त्रालयले देशभरका प्रमुख जिल्ला अधिकारीहरूसँग सुरक्षा अवस्थाबारे गहन छलफल गरेको छ । छलफलका क्रममा उच्च जोखिमयुक्त बस्तीहरूमा तत्काल सुरक्षा संयन्त्रहरू परिचालन गर्ने महत्वपूर्ण निर्णय भएको छ । सम्भावित विपद्बाट नागरिकको जीवन रक्षाका लागि नेपाली सेनाको हेलिकप्टर पनि आकस्मिक उद्धारका लागि तयारी अवस्थामा राखिएको गृह मन्त्रालयले जनाएको छ ।

सरकारले नागरिकहरूलाई विशेष सावधानी अपनाउन, बाढी र पहिरोको जोखिम भएका क्षेत्रमा यात्रा नगर्न र स्थानीय प्रशासनद्वारा जारी गरिएका निर्देशनहरूको पालना गर्न आग्रह गरेको छ ।