काठमाडौं । खानेपानी मन्त्री प्रदिप यादवलाई फोनमा धम्की दिएको आरोपमा पक्राउ परेकी किरण साह पाँच हजार रुपैयाँ धरौटीमा रिहा भएकी छिन् । पर्सा अदालतले बिहीबार रिहा गर्ने आदेश दिएपछि उनले धरौटी बुझाएर कारागारमुक्त भएकी हुन् ।
साहमाथि ज्यान मार्ने धम्की, साइबर अपराध र अफवाह फैलाएको गरी तीन कसुरमा अनुसन्धान भइरहेको थियो ।
वीरगञ्जमा फैलिएको हैजाबारे साहले मन्त्री यादवलाई फोन गरेकी थिइन् । सार्वजनिक अडियोमा साहले मन्त्रीलाई ‘आफू नडराउने र नछाड्ने’ धम्कीपूर्ण भाषा प्रयोग गरेको सुनिन्छ । प्रहरी स्रोतका अनुसार, मन्त्रीलाई फोन गरेको अडियो रेकर्ड गरी पत्रकारलाई दिइएको र पछि ‘ज्यान से मार्दुङ्गा’ (ज्यानै मार्छु) भनिएको अंश काटेर सम्पादन गरी सार्वजनिक गरिएको थियो ।
यो प्रकरणले अभिव्यक्ति स्वतन्त्रता, सार्वजनिक पद धारण गरेका व्यक्तिको जवाफदेहीता र अडियो सम्पादनको नैतिकतामाथि नयाँ बहस सिर्जना गरेको छ । न्यायिक प्रक्रियाले यस घटनाको थप सत्यतथ्य बाहिर ल्याउनेछ ।
