काठमाडौं । सत्ताको प्रमुख साझेदार दल नेपाली कांग्रेसले आफ्नो पार्टीबाट सरकारमा सहभागी मन्त्रीहरू हेरफेर नगर्ने अडान लिएको छ । प्रधानमन्त्री केपी शर्मा ओलीले सरकार गठनको एक वर्ष पुगेको अवसरमा मन्त्रिपरिषद् पुनर्गठन गर्न चाहेको चर्चा चलिरहेका बेला कांग्रेसले यस्तो निर्णय लिएको हो । यो निर्णयले मन्त्रिपरिषद् हेरफेरको प्रक्रियामा प्रधानमन्त्रीलाई सकस परेको छ ।

पार्टीका शीर्ष नेताहरूको बैठकमा मन्त्री हेरफेरबारे कुनै छलफल नै नभएको मुख्यसचिव कृष्णप्रसाद पौडेलले जानकारी दिए । ‘आजको बैठकमा मन्त्री फेरबदलको कुनै एजेन्डा थिएन,’ उनले भने, ‘जसपा र लोसपामा मन्त्री फेर्ने कुरा चलिरहेको छ, यसबारे प्रधानमन्त्रीले चासो राख्नु स्वाभाविक हो । तर, हाम्रो पार्टीभित्र मन्त्री फेरफेरको कुनै चर्चा छैन ।’

कांग्रेसले मन्त्री हेरफेरमा अनिच्छा देखाए पनि गठबन्धनका अन्य दलहरू, विशेषगरी जनता समाजवादी पार्टी (जसपा) र लोकतान्त्रिक समाजवादी पार्टी (लोसपा) ले भने प्रधानमन्त्रीलाई मन्त्री बदल्न निरन्तर दबाब दिइरहेका छन् ।

जसपाले खानेपानीमन्त्री प्रदीप यादव र महिला, बालबालिका तथा ज्येष्ठ नागरिकमन्त्री नवलकिशोर सुडीलाई फिर्ता बोलाएर उनीहरूको ठाउँमा वीरेन्द्र महतो र रञ्जुकुमारी झालाई पठाउन प्रधानमन्त्रीलाई नाम बुझाइसकेको छ । त्यसैगरी, लोसपाले पनि श्रम, रोजगार तथा सामाजिक सुरक्षामन्त्री शरदसिंह भण्डारीलाई फिर्ता बोलाएर सर्वेन्द्रनाथ शुक्ललाई सरकारमा पठाउन आग्रह गरेको छ ।

गठबन्धनका अन्य दलबाट मन्त्री फेर्न दबाब बढेपछि प्रधानमन्त्री ओलीले कांग्रेसका पनि केही मन्त्री फेरबदल भएमा सन्तुलन मिलाउन सहज हुने अपेक्षा गरेका थिए । तर, कांग्रेसले आफ्ना मन्त्रीहरूको कामकारबाहीमा सन्तुष्ट रहेको भन्दै हेरफेर नगर्ने अडान लिएपछि प्रधानमन्त्रीलाई राजनीतिक दबाब बढेको हो । हाल कांग्रेसका तर्फबाट उपप्रधान तथा शहरी विकास मन्त्री प्रकाशमान सिंहले सरकारमा नेतृत्व गरिरहेका छन्