चोरी केसमै जेल परेका हर्कबहादुरले छुटेलगत्तै चोरे १५ तोला सुन

काठमाडौं । धनगढी उप-महानगरपालिका-४ बसपार्क स्थित योगेन्द्र ओझाको घरबाट चोरी भएका थप गरगहना प्रहरीले बरामद गरेको छ । उपमहानगरपालिकाकै वडा नम्बर १ बस्ने गीता भण्डारीले सञ्चालन गरेको खाजा पसल भित्र तथा सोही नजिक निजले भाडामा लिएको जमिनमा गाडिएको अवस्थामा ती गरगहना फेला परेको हो ।

जिल्ला प्रहरी कार्यालय कैलालीका अनुसार जमिनमा खाल्डो बनाई लुकाई राखेको अवस्थामा शनिबार नौगेडी १ थान , मङ्गलसूत्र १ थान, बरमाला १ थान, फेन्सीमाला १ थान, पत्थरवाला माला १ थान, बाला १ थान , ठुलो टप २ जोर (चार पिस), विभिन्न प्रकारका सानो टप (१३पिस), अँगुठी १ थान, सिक्री १ थान, हिरा जस्तो देखिने सिक्री १ थान, र नगद रु. ३४६ रुपैयाँ बरामद गरिएको छ ।

प्रहरीले चोरीको आरोपमा हर्कबहादुर गिरीलाई पक्राउ गरी चोरी मुद्दामा थप अनुसन्धान गरिरहेको छ ।

गिरिको आपराधिक यात्रा
गिरिको स्थायी घर भीमदत्त नगरपालिकाको वडा नम्बर १८ कञ्चनपुर हो । उनी २६ वर्षको उमेर भएका बेला २०७७ सालमा धनगढी आएर चोरीजन्य अपराधमा संलग्न भए । त्यतीबेला कतिपयका मोबाइल चोर्ने अपराध गरे । उनले धनगढी उपमहानगरपालिका वडा नम्बर ४ का महेशराज जोशीको मोबाइल चोरेपछि उनको विरुद्ध मुद्दा प-यो ।

गिरिका विरुद्ध जोशीले २०७७ साल कार्तिक २७ गते जिल्ला प्रहरी कार्यालय कैलालीमा मुद्दा दर्ता गरे । उनी पक्राउ पनि परे । गिरिलाई जिल्ला अदालत कैलालीले २०७७ सालको चैत ४ गते चोरीको मुद्दामा साढे ३ वर्ष कैद र ३० हजार जरिवाना तोक्यो ।

कैलाली कारागारका प्रमुख दीपक जोशीले गिरि साढे ३ वर्षको सजाय भुक्तान गरेर यसै साउनको १७ गते जेलमुक्त भएका हुन । उनले जेलमुक्त भएको सातौँ दिन अथवा साउनको २३ गते दिउसो साढे ११ बजेतिर ओझाको बसपार्क नजिकैको घरको २ वटा ताला तोडेर दराजभित्र राखेको सुन, चाँदी र नगदी चोरी गरे ।

उनले चोरी गरेको गहना आफ्नो धर्मदिदीको माइतीको धनगढी १ (नैनादेबी गेट नजिक) स्थिति घरमा लुकाएर राखे भने उनी चोरी भएको दिन राती सुत्न अमित प्लाजाभित्रको गल्लीमा रहेको आफ्नो नेपाली थरको साथीकोमा गए । गहना चोर्दै बिक्री गरेको रकमले पार्टी गरिरहेका बेला उनलाई बिहीबार प्रहरीले पक्राउ गरेको हो ।

यसरी पत्ता लाग्यो, सुराक
ओझाको घरनजिकैको सिसि क्यामेरा गिरिको सुराक पत्ता लगाउने मुख्य कारण बन्यो । उनले घरमा पसेको, निस्केको र त्यहाँबाट बाहिर बजारतिर गएको सिसिक्यामेराको भिडियो प्रहरीले फेला पारेको छ ।

त्यही भिडियोको आधारमा प्रहरीले उनलाई मुख्य बजारमा पनि फलो गरेको थियो । उनी, रातोपुलबाट अटो चढेर नैनादेबी मन्दिर जाने गेट नजिक गए । त्यहाँ अटोबाट ओर्लिएका उनले मुख्य बजारमै रहेको धर्मदिदीको माइतीको घरमा गएको भिडियोले प्रहरीले उनको पहिचान गरेको हो ।

गिरिलाई शुक्रबार जिल्ला अदालत कैलालीबाट म्याद थप गरेर अनुसन्धान भईरहेको मुद्दा शाखाका इन्चार्ज उपेन्द्र बमले जनाएका छन ।