महिलालाई ‘बोक्सी’ भन्दै मलमूत्र खुवाउने पारो पक्राउ

काठमाडौं । महिलालाई बोक्सीको आरोप लगाउँदै मानव मलमूत्र खुवाएको आरोपमा बुढीगंगा गाउँपालिका- ७ की ५० वर्षीया पारोदेवी माझी पक्राउ परेकी छन् ।

बोक्सीको आरोप लगाएर महिलामाथि अमानवीय व्यवहार गर्ने बुढीगंगा सातकी माझीलाई पक्राउ गरिएको मोरङ प्रहरीका प्रवक्ता डीएसपी रञ्जनकुमार दाहालले जानकारी दिए । पक्राउ परेकी महिला गाउँ घरमा धामीझाँक्रीको काम गर्दै आएकी छन् ।

उनले मोरङको बुढीगंगा गाउँपालिका- ७ मा कुटपिट र यातना दिँदै ५५ वर्षीया महिलालाई बिहीबार दिउँसो मानव मलमूत्र खुवाएको प्रहरीले जनाएको छ । माझीको घरमा अष्टजाम पूजामा प्रयोग गरेको दियो हराएपछि पीडित महिलालाई चोरीको आरोप लगाउँदै यातना दिइएको हो ।