सातै प्रदेशका अधिकृतको कार्यालयमा पुर्याइयो मतपत्र

काठमाडौँ । माघ ११ गते सम्पन्न हुने राष्ट्रिय सभासदस्य निर्वाचनका सबै मतपत्रहरू छपाई गरी सातै प्रदेशका निर्वाचन अधिकृतहरूको कार्यालयमा पुर्याउने कार्य सम्पन्न भएको छ ।

तोकिएको समय (मिति २०८० माघ ५ गते) मा नै निर्वाचन आयोगले स्वीकृत गरेको मतपत्रको डिजाइन तथा मापदण्ड बमोजिमका सबै मतपत्रहरू छपाई गरी निर्वाचन अधिकृतहरूको कार्यालयमा पुर्याइएको हो ।

राष्ट्रिय सभा सदस्य निर्वाचनमा प्रदेशसभाका सदस्य र गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुख रहेको निर्वाचक मण्डलद्वारा मतदान हुने कानुनी व्यवस्थाअनुसार प्रदेशसभाका सदस्यकालागि सेतो रङको का गजमा हरियो रङको मसीको विवरण तथा निर्वाचन चिह्न मतपत्र रहेको छ ।

गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुखका लागि सेतो रङको कागजमा रातो रङको मसीको विवरण तथा निर्वाचन चिह्न रहेको मतपत्रहरू छपाई भएका छन् ।

प्रदेशगत रुपमा रहेका निर्वाचक मण्डलका सदस्यको संख्या तथा निर्वाचन हुने पद सङ्ख्यालाई आधार मानी आयोगले तोकेको सङ्ख्यागत मापदण्डका आधारमा कोशी प्रदेशमा निर्वाचन हुने दुई पदका लागि चार प्रकारका ९२० मतपत्र रहेको निर्वाचन आयोगले जनाएको छ ।

मधेश प्रदेशमा निर्वाचन हुने दुई पदका लागि चार प्रकारका ९४० मतपत्र, बागमती प्रदेशमा निर्वाचन हुने चार पदका लागि आठ प्रकारका १७६० मतपत्र र गण्डकी प्रदेशमा निर्वाचन हुने तीन पदका लागि ६ प्रकारका ९०० मतपत्रहरू रहेका छन् ।

त्यसैगरी लुम्बिनी प्रदेशमा निर्वाचन हुने दुई पदका लागि चार प्रकारका ७४० मतपत्र, कर्णाली प्रदेशमा निर्वाचन हुने तीन पदका लागि छ प्रकारका ७५० मतपत्र र सुदूरपश्चिम प्रदेशमा निर्वाचन हुने तीन पदका लागि छ प्रकारका ९०० मतपत्रहरू रहेका छन् ।

संवत् २०८० फाल्गुन २० गते देखि रिक्त हुने १९ राष्ट्रिय सभा सदस्य पदको लागि आगामी माघ ११ गते सम्बन्धित प्रदेशका तोकिएका मतदान स्थल तथा मतदान केन्द्रहरूमा बिहान ९ बजे देखि अपराह्न ३ बजेसम्म हुने मतदान प्रयोजनका लागि ३८ प्रकारका कूल ६९१० मतपत्रहरू छपाई गरी पठाइएको निर्वाचन आयोगले जनाएको छ ।

यस निर्वाचनबाट निर्वाचित हुने राष्ट्रिय सभा सदस्यहरूको पदावधि २०८० फाल्गुन २१ गते देखि ६ वर्षसम्म रहनेछ ।