‘शून्य समय’ को नाम ‘मन्त्रीले सुन्ने समय’ राखियोस् : सांसद खतिवडा

काठमाडौं । सत्तारुढ नेपाली कांग्रेसका सांसद रामहरि खतिवडाले शून्य समयको नाम परिवर्तन गरेर ‘मन्त्रीले सुन्ने समय’ राख्न माग गरेका छन् । प्रतिनिधिसभाको शून्य समयमा बोल्दै उनले यस्तो माग गरेका हुन् ।

शून्य समयमा उठाएका विषय प्रभावकारी हुन नसकेको गुनासो उनले गरे । ‘शून्य समयलाई जिरो समयका रूपमा होइन, यसको नामकरण गरेर मन्त्रीले सुन्ने समय राखियोस्, नभए यो जिरो हुने भयो’, उनले भने ।

सांसद खतिवडाले संसदीय सुनुवाइ समिति गठन गरेर प्रधानन्यायाधीश नियुक्त गर्न पनि माग गरे । संवैधानिक परिषद्को सिफारिसपछि उक्त समितिमा प्रधानन्यायाधीशको सुनुवाइ हुने व्यवस्था छ । सुनुवाइपछि सिफारिस स्वीकृत भएमा नियुक्तिका लागि योग्य मानिन्छ ।

‘संसदीय सुनुवाइ समिति नहुँदा प्रधानन्यायाधीश नियुक्त हुन सकेनन् । जसले एक लाख ६८ हजार मुद्दा सुनुवाइ थाती छन् । चाँडोभन्दा चाँडो प्रधानन्यायाधीश नियुक्त गरियोस्’, उनले भने । उनले लम्पी स्किन रोग नियन्त्रणका लागि समेत सरकारलाई आग्रह गरे ।