टिपरले बिजुलीको तार छुँदा चालकको गयो ज्यान, सहचालकको उपचार हुँदै

काठमाडाैं । दार्चुलाको मार्मा गाउँपालिका–३ नलबगरमा आइतबार बिहान करेन्ट लागेर टिपर चालकको ज्यान गएको छ । टिपरको ढाला बिजुलीको तारमा लागेर सख्त घाइते भएका कैलालीको लम्कीचुहा नगरपालिका चिसापानी बस्ने २३ वर्षीय लिला थापाको उपचारका लागि अस्पताल लैजाँदै गर्दा मृत्यु भएको हो ।

उपचारका लागि अस्पताल लैजाने बेला थापाको बाटोमै ज्यान गएको जिल्ला प्रहरी कार्यालय दार्चुलाका प्रहरी निरीक्षक राजेश शाहीले जानकारी दिए । बिहान ९ बजे सडकमा माटो फिलिङ गर्ने क्रममा से १ क ११३० नम्बरको टिपरको पछाडि पट्टिको भागले बिजुलीको नांगो तारलाई छुँदा टिपर चालक थापा घाइते भएका थिए ।

प्रहरीका अनुसार सहचालक मार्मा गाउँपालिका– ६ का अन्दाजी १९ वर्षीय प्रकाश सिंह ठगुन्ना घाइते भएका छन् । घाइते भएका सहचालकको गोकुलेश्वर अस्पतालमा उपचार भइरहेको छ ।