नेशनल लाइफ इन्स्योरेन्सकाे ३३ औँ वार्षिक साधारणसभा सम्पन्न

नेशनल लाइफ इन्स्योरेन्स कम्पनी लिमिटेडको ३३ औँ वार्षिक साधारणसभाबाट आर्थिक वर्ष २०७६/७७ को लाभांश पारित भएको छ।

लाजिम्पाटस्थित कम्पनीको केन्द्रीय कार्यालयमा वेभिनारमार्फत भएको सभाले उक्त आर्थिक वर्षका लागि प्रस्तावित चुक्तापुँजीको १९ प्रतिशत बोनस सेयर र बोनस सेयर कर प्रयोजनार्थ रु.३ करोड ३९ लाख ८ हजार ८९२ नगद लाभांश अनुमोदन गरेको हो।

यसैगरी सभाबाट संस्थापक समूहबाट ३ जना प्रेमा राज्यलक्ष्मी सिंह, पवनबहादुर पाँडे र कुशल मल्ली सञ्चालकमा निर्वाचित हुन भएका छन् भने सर्वसाधारण समूहबाट २ जना भवानी राणा र कुलदीप शरण सिंह निर्वाचित भएका छन्।

सभा कम्पनीकी अध्यक्ष प्रेमा सिंहको अध्यक्षमा सम्पन्न भएको थियो। अध्यक्ष सिंहले कोभिडको प्रकोप यथावत रहे पनि प्रतिस्पर्धात्मक बजार एवं नियामकीय प्रयासहरुका साथै बीमितको आवश्यकताअनुसारको उच्च गुणस्तरीय बीमा योजनाहरुले गर्दा जीवन बीमा बजारका लागि राम्रो आधार सिर्जना भएको बताइन्। नेपालको बीमा बजारमा आउने दिनहरुमा जोखिम सुरक्षा गर्ने बीमा योजनाहरुको बढी माग हुने आँकलन गर्दै आर्थिक समावेशी एवं वित्तिय साक्षरतामा बृद्धि गर्ने नेपाल सरकारको प्रयासहरु साथै बढ्दो घरेलु वचत एवं प्रतिव्यक्ति आम्दानीमा भएको वृद्धिका कारणले समेत जीवन बीमा क्षेत्रमा थप टेवा पुग्न गएको उनको धारणा थियो।

अध्यक्ष सिंहले आव २०७६/७७ मा कम्पनीको सबै वित्तीय सूचकांकहरु उत्साहप्रद रहेको बताइन्। कुल बीमाशुल्क १५.१२ प्रतिशतले वृद्धि भई ९ अर्ब २६ करोड ७४ लाख पुगेको छ । जीवन बीमा कोष २४.२९ प्रतिशतले वृद्धि भई ३३ अर्ब ४६ करोड पुगेको र कुल लगानी १८.८४ प्रतिशतले वृद्धि भई ३१ अर्ब ८५ करोड पुगेको छ ।

कम्पनीको लगानी प्रतिफलमा स्थायित्व ल्याउन कम्पनी प्रयासरत रहेको र आव २०७६/७७ मा वार्षिक औसत प्रतिफल १०.१६ प्रतिशत कायम रहेको छ। यसका साथै कम्पनीको चुक्तापुँजीसमेत सन्तोषजनक रहेको र चालु वर्षको बोनससमेत गरी कुल पुँजी रु. ४ अर्ब ३ करोड नाघेको छ।