मन्त्री यादवको बचाउ गर्दै जसपाले भन्यो- सीके राउतका कार्यकर्तालाई नियन्त्रणमा लिइयोस्

काठमाडाैँ । हिंसा भड्काउने खालको अभिव्यक्ति दिएकी भौतिक पूर्वाधार तथा यातायात मन्त्री रेणु यादवको जनता समाजवादी पार्टी (जसपा) नेपालले बचाउ गरेको छ । मन्त्री यादवको चौतर्फी आलोचना भएकाले पदबाट राजीनामा दिनुपर्ने दबाब बढेपछि जसपाले शनिवार एक विज्ञप्ति जारी गर्दै उनको बचाउ गरेको हो ।

जसपाले मन्त्री यादवको प्रमुख आतिथ्यतामा रौतहटमा आयोजित ‘बलिदानी दिवस’ को कार्यक्रमलाई जनमत पार्टीका नेता कार्यकर्ताले कार्यक्रमलाई बिथोल्ने, आतंक मच्चाउने र हिंसा भड्काउने क्रियाकलापमा संलग्न रहेको भनेको छ ।

‘रौतहटमा आयोजित ‘बलिदानी दिवस’ को कार्यक्रमलाई जनमत पार्टीका नाममा उक्त पार्टीका नेता तथा कार्यकर्ताहरू सुनियोजित ढंगबाट लाठी, भाँटा, ढुंगा आदि लिई उक्त कार्यक्रमलाई अवरोध गर्ने, कार्यक्रम बिथोल्ने, आतंक मच्याउने र हिंसा भड्काउनेजस्ता गैर–राजनीतिक एवम् आपराधिक क्रियाकलापमा संलग्न थिए,’ विज्ञप्तिमा भनिएको छ, ‘उक्त पार्टीद्वारा गराइएका यस्ता उद्दण्ड, गैर–राजनीतिक, उच्छृङ्खल, अभद्र, अशोभनीय र आपराधिक कार्यको जसपा नेपाल घोर विरोध एवम् भर्त्सना गर्दछ ।’

साथै जसपाले यस्ता आपराधिक कार्य नगर्न सचेत पनि गराएको छ । यस्तै जसपाले अमर्यादित क्रियाकलाप नियन्त्रण गर्न सरकारसँग आग्रहसमेत गरेको छ ।