काठमाडौँ उपत्यकामा ‘स्मार्ट लकडाउन’को तयारी

काठमाडौँ । काठमाडौँ उपत्यकाका तीन जिल्लाका प्रमुख जिल्ला अधिकारीको बैठक बस्दैछ । कोभिड-१९ महामारीको नयाँ स्वरूप ओमिक्रोनको संक्रमण बढ्न थालेपछि आवश्यक निर्णय लिन काठमाडौँ, भक्तपुर र ललितपुरका प्रजिअहरुको बैठक बस्न लागेको हो ।

बैठकले कोभिड-१९ को संक्रमण रोकथामका लागि आवश्यक निर्णय लिने भक्तपुरका प्रजिअ रुद्रादेवि शर्माले जानकारी दिइन् । उनकाअनुसार बैठक भौतिक उपस्थितिमै गर्ने कि भर्चुअल माध्यमबाट गर्ने भन्ने विषयमा आन्तरिक छलफल भइरहेको छ । काठमाडौँका प्रमुख जिल्ला अधिकारी गोविन्दप्रसाद रिजाललाई कोरोना संक्रमण भएकाले बैठक भर्चुअल माध्यमबाट गर्ने तयारी भइरहेको उनको भनाई छ ।

कोभिड-१९ संकट व्यवस्थापन समन्वय केन्द्र (सीसीएमसी)ले कोरोना संक्रमण रोकथाम तथा नियन्त्रण गर्न ‘लकडाउन’ लगायत सबै किसिमका प्रतिकार्य योजना लागू गर्ने अधिकार प्रमुख जिल्ला अधिकारीलाई दिएको छ । यही अधिकार प्रयोग गर्दै उपत्यकामा ‘स्मार्ट लकडाउन’ गर्ने तयारी भइरहेको बुझिएको छ । जिल्ला प्रशासन कार्यालयबाट प्रदान गरिने अत्यावश्यकबाहेकका सेवाहरू ‘आलोपालो’ प्रदान गर्ने विषयमा छलफल भइरहेको भक्तपुरमा प्रजिअ शर्माले बताइन् ।

तत्काललाई मास्क, सेनिटाइजरको प्रयोग, अनावश्यक भिडभाड नियन्त्रण र सचेतनासँगै खोपमा प्रशासनले जोड दिएको छ । ‘संक्रमणको दर बढेको हुनाले मन्त्रालयसँग समन्वय गरेर कसरी अघि बढ्ने भन्ने निर्णय लिन्छौँ,’ प्रजिअ शर्माले भनिन्, ‘अवस्था हेरेर उपत्यकामा स्मार्ट लकडाउन गर्नेबारे निर्णय हुनसक्छ ।’