जिल्ला कारागार मोरङमा कैदीको शंकास्पद मृत्यु, हत्या गरिएकाे परिवारकाे आशंका

जिल्ला कारागार मोरङभित्र बुधबार राति एक कैदीको मृत्यु भएको छ। जबरजस्ती करणी मुद्दामा ६ बर्षदेखि कारागारमा कैद भुक्तान गरिरहेका मोरङ रतुवामाई नगरपालिका–१० साविक इटहरा–८ का ४३ वर्षीय नारायण थापाको मृत्यु भएको हो।

पेट दुखेपछि उपचारका लागि बिहीबार राति १ बजे कोसी अस्पताल ल्याउँदै गर्दा बाटो मै मृत्यु भएको निमित्त जेलर राम पोखरेलले जानकारी दिए। मृतक थापाको शव कोसी अस्पतालमै राखिएको छ। उनले आफन्तलाई शव बुझ्न बोलाएको बताएका छन्। आफन्तले शव पोष्टमार्टम गर्ने कि नगर्ने भन्ने विषयमा समेत छलफल नभएको उनले बताए।

मृतक नारायणका नातामा काका पर्ने शंकर थापाले भतिजाको मृत्यु रहस्यमय रहेको बताएका छन्। विरामी भएको जानकारी नगराई मरेको मात्रै सूचना दिनुले शंका उत्पन्न भएको थापाले बताए।