जन्ती बोकेको जिप दुर्घटना: दुलहा-दुलहीसहित १२ घाइते

काठमाडाैँ । बैतडीको पाटन-खोड्पे सडकखण्डमा पर्ने हिरापुर भन्ने स्थानमा जन्ती जीप दुर्घटना हुँदा बेहुला-बेहुलीसहित १२ जना घाइते भएका छन् । घाइतेहरुमध्ये दुईको अवस्था गम्भीर छ ।

कञ्चनपुरको महेन्द्रनगरबाट जन्ती लिएर फर्किंदै गरेको सुदूरपश्चिम प्रदेशको ०१-००१ च ३७७ नम्बरको जीप आज विहान ५ः५० बजे दुर्घटनामा परेको हो । दुर्घटनामा १० जना सामान्य र दुई जना गम्भीर घाइते भएको जिल्ला प्रहरी कार्यालय बैतडीका प्रवक्ता एवम् इन्सपेक्टर किशोर ऐरीले जानकारी दिएका छन् ।

उनका अनुसार दुर्घटनामा बेहुला-बेहुली पनि घाइते भएका छन् । उनीहरुको अवस्था सामान्य छ । घाइते सबैको बैतडीको पाटन अस्पतालमा उपचार भइरहेको छ । जीप सडकबाट करिब एक सय मिटर तल खसेको छ । घटनास्थल इलाका प्रहरी कार्यालय पाटनबाट १० किलोमिटर टाढा पर्दछ ।