म्याग्दी पहिरो : मृतकको संख्या १७ पुग्यो [अपडेट]

म्याग्दी । लगातारको भारी वर्षापछि शुक्रबार म्याग्दीमा आएको बाढी-पहिरोमा परी ज्यान गुमाउनेको १७ पुगेको छ । तीन जनाको भने जीवितै उद्धार गरिएको प्रहरीले जानकारी दिएको छ ।

धौलागिरी र मालिका गाउँपालिकामा गएको पहिरोमा नेपाल प्रहरी र सेनाको संयुक्त टोलीले बेपत्ताहरुको खोजी गर्ने क्रममा १७ जनालाई मृत अवस्थामा फेला पारेको हो । जसमध्ये ३ जनालाई घाइते अवस्थामा उद्धार गरिएको प्रहरी नायब उपरीक्षक राजेन्द्रबाबु रेग्मीले जानकारी दिएका छन् । घाइतेहरुलाई हेलिकप्टरबाट उद्धार गरी उपचारका लागि बेनी अस्पताल र पोखरा मणिपाल अस्पताल पठाइएको छ ।

अन्य बेपत्ताहरुको खोजी जारी रहेको प्रहरी नायब उपरीक्षक रेग्मीले बताए । घटनाको दुई दिन बित्दासम्म बाढी पहिरोको सबैभन्दा बढी प्रभावित क्षेत्रमा राज्य संयन्त्र र उद्धारकर्ता नआएको भन्दै पीडितले गुनासो गरेका छन् ।

‘हामी बाँच्यौं, हराएकाको भोकभोकै खोजीमा जुटेका छौं । पहिरोले सबैभन्दा बढी क्षति पुर्‍याएको मराङको अवाङ, राम्चे क्षेत्रमा अहिलेसम्म राज्यको उपस्थिति देख्न नपाउँदा खिन्न भएका छौं,’ स्थानीय अगुवा चक्रबहादुर पुनले भने, ‘बाढी पहिरोबाट जोगिएका गाउँबाट युवालाई गुहार मागेर पहिरोमा खोतल्दै छौं । केहीको शव फेला परेको पनि छ ।’

यस्तै पहिरोको उच्च जोखिममा भएका २२० जनालाई सुरक्षित स्थानमा सारिएको प्रहरीले बताएको छ । रघुगंगा गाउँपालिका ३ गलेश्वर राहुँघाट खोला नजिकका २१ घर धुरीका ८५ जनालाई गायत्री मन्दिरमा, धवलागिरी गाउँपालिका ६ कल्लेनी जहरेका ८९ जनालाई धौलागिरी ७ शिवाङ्गस्थित हेम माध्यमिक विद्यालयमा ५० जना र अन्य २९ जनालाई आफन्तको सारिएको छ ।

यस्तै मालिका गाउँपालिका-५ र ६ का ९ घरका ४६ जनालाई जनप्रिय माध्यमिक विद्यालय दरबाङमा सारिएको प्रहरीले बताएको छ ।

मृतकहरुको सूची

धौलागिरी गाउँपालिका
१. सुकुना लामगादे
२.आशिष लामगादे
३.आयुष लामगादे
४.आयुषा लामगादे
५.रेश्मा सुनार
६.मन सुनार
७.कमला श्रीपाली
८.सुरक्षा श्रीपाली
९.सुरज श्रीपाली
१०.प्रकाश केसी

मालिका गाउँपालिका
११. गौदेवी नेपाली (३० वर्ष)
१२. विशेष नेपाली (५ वर्ष)
१३. वीरबहादुर नेपाली (३१ वर्ष)
१४. विष्णु नेपाली
१५. सन्दीप नेपाली (५ वर्ष)
१६. निशा नेपाली (२ महिना)
१७. विष्णु पौडेल (४० वर्ष)

घाइतेहरु
बेनी अस्पतालमा उपचार गराइरहेका
१.मालिका गाउँपालिका ०७ विमका पूर्णबहादुर नेपाली
पोखरा मणिपाल शिक्षण अस्पताल रिफर गरिएका बिरामी
२. धौलागिरी गाउँपालिका–६ की २२ वर्षीया मन्जिता श्रीपाली (गर्भवती)
३. धौलागिरी गाउँपालिका–६ का ७ वर्षीय सफल श्रीपाली