किसानका पीडा : उखुको भुक्तानी लिन ३० पटक काठमाडौं

कपिलवस्तु ।  उखुको बक्यौता भुक्तानीका लागि दबाब दिन भन्दै उनी प्रत्येक महिना काठमाडौं पुग्छन् । तीन वर्षदेखि उनी नियमित धाइरहेका छन् । झन्डै तीन वर्षमा ३० पटक काठमाडौं धाइसके । काठमाडौं आउजाउमै आठ लाख रुपैयाँभन्दा बढी खर्च भइसक्यो । अहिलेसम्म उखुबापतको भुक्तानी पाउन सकेका छैनन् । उनी किसान संघ अध्यक्ष अनुपकुमार चौधरी हुन् । ऋण गरेर जिल्लाका कृषक बटुलेर काठमाडौं पुग्छन् ।

प्रत्येकपटक मन्त्री र सम्बन्धित मन्त्रालयका कर्मचारीको ध्यानाकर्षण गर्छन् । आश्वासन पाउँछन् । विश्वासले फर्किन्छन् । ०७३ माघमा पहिलोपटक सात जना कृषक लिएर गएका थिए । पछिल्लोपटक गत पुस ३ गते ५ जना कृषकसहित काठमाडौं पुगे । ‘माघ अन्तिमतिर ३१औं पटक जाने तयारी गरेको छु,’ उनले भने, ‘थाकेका छैनौं ।’ चुलोचौको चलाउन जोहो गरेको अन्नपात बेचेर भए पनि जाने गरेको अर्का किसान ओमप्रकाश कुर्मीले बताए । ‘पाँच/सात जनाबाट उठेको रकम बोकेर रात्रि बसमा हुइँकिन्छौं,’ उनले भने, ‘घरबाटै लगेको नुन, भुजा खाँदै गएर फर्कन्छौं ।’