११ वर्षीया बालिकालाई यौन दुर्व्यवहार गरी भाग्दा लडेर मृत्यु

काठमाडाैँ । बालिकामाथि यौन दुर्व्यवहार गरेको आरोपमा गाउँलेले लखेट्दा एक युवकले ज्यान गुमाएका छन्।

बालिकामाथि दुर्व्यबहार गरेको थाहा पाएर गाउँलेले हल्ला गरेपछि भाग्दा भिरबाट खोलाकिनारमा खसेर गम्भीर घाइते भएका युवकको उपचारका क्रममा आइतबार मृत्यु भएको हो।

पश्चिम मकवानपुरको राक्सीङ्ग गाउँपालिका ५ घर भई मनहरी गाउँपालिका ७ बस्ने २२ बर्षीय सविन प्रजाको मृत्यु भएको हो।

माघ ८ गते घाइते भएका प्रजाको भरतपुरस्थित नयाँ मेडिकल कलेजमा मृत्यु भएको मकवानपुर प्रहरीका प्रवक्ता एवम् प्रहरी नायव उपरिक्षक यज्ञप्रसाद भट्टराईले बताए। यो खबर आजको नागरिक दैनिकमा मकवानपुरबाट अशोकसुजन श्रेष्ठले लेखेका छन्।

उनका अनुसार मदिराको नसाको सुरमा प्रजाले घरमा अभिभावक नभएको मौका छोपी ११ बर्षिया बालिकामाथि दुर्व्यबहार गरिरहेको आरोप गाउँलेले लगाएका छन्।

मृतक प्रजाका आफन्तले गाउँलेले लखेटेर भिरबाट लडाएको भनेर उजुरी प्रहरीमा दिएका छन् भने गाउँलेले चाहीँ दुर्व्यबहार गरेर भाग्दै गर्दा आफैँ लडेको उजुरी दिएका छन्।