काठमाडौँ । जारी नेपाल प्रिमियर लिग (एनपीएल) अन्तर्गत सुदूरपश्चिम रोयल्सले विजयी सुरुवात गरेको छ । बुधबार सम्पन्न खेलमा सुदूरपश्चिम रोयल्सले काठमाडौँ गोर्खाजलाई २९ रनले पराजित गरेको हो ।
सुदूरपश्चिमले दिएको १४८ रनको लक्ष्य पछाएको काठमाडौँ गोर्खाजले १६.५ ओभरमा ११८ रन बनाएर अलआउट भएको थियो ।
काठमाडौँ गोर्खाजका लागि आकाश त्रिपाठीले सर्बाधिक ३४ रन बनाए भने जोन साम्पसनले २४ र सन्नी पटेलले १० रन बनाए । त्यस्तै सुदूरपश्चिमका बलर स्कट कुगेलेइजिन, हेमन्त धामी र हर्मित धामीले २-२ विकेट लिएका थिए ।
यसअघि टस हारेर पहिला ब्याटिङ गरेको सुदूरपश्चिम रोयल्सले २० ओभरमा अल आउट हुँदै १४७ रन बनाएको थियो ।
यो सुदूरपश्चिमको यस सिजनको पहिलो खेल हो भने पहिलो खेलमा जित हासिल गरेको काठमाडौँ गोर्खाजले दोस्रो खेलमा भने हार बेहोरेको छ । एनपीएल अन्तर्गत बिहीबार चितवन राइनोज र लुम्बिनी लायन्सबीच खेल हुँदैछ ।
