काठमाडौं । नेपालको महत्त्वपूर्ण पूर्वाधार, बीपी राजमार्गको पुनर्निर्माण तथा मर्मतसम्भारका लागि नेपाल सरकार र जापान सरकारबीच एक महत्त्वपूर्ण अनुदान सम्झौतामा हस्ताक्षर भएको छ । यस सम्झौताअनुसार जापान सरकारले २ अर्ब ८० करोड जापानी येन (नेपाली २ अर्ब ६० करोड रुपैयाँ) बराबरको अनुदान सहायता उपलब्ध गराउनेछ ।
अर्थ मन्त्रालयमा आयोजित एक विशेष कार्यक्रममा अर्थमन्त्री रामेश्वर खनाल र गृहमन्त्री ओम प्रकाश अर्यालको उपस्थितिमा यो सम्झौतामा हस्ताक्षर भएको हो । सम्झौतापत्रमा नेपालका अर्थसचिव घनश्याम उपाध्याय र नेपालका लागि जापानी राजदूत तोरु माएदाले हस्ताक्षर गरेका छन् ।
सन् २०१५ को विनाशकारी भूकम्प र गत वर्षको बाढीपहिरोले १५९ किलोमिटर लामो यस राजमार्गका विभिन्न खण्डमा गम्भीर क्षति पुर्याएको थियो । विशेषगरी, रोशी खोला आसपासको खण्ड पूर्ण रूपमा क्षतिग्रस्त भएको थियो, जसका कारण यातायात आवागमनमा ठूलो समस्या उत्पन्न भएको थियो । जापान सरकारको अनुदान सहयोगमा निर्मित यो राजमार्ग महोत्तरीको बर्दिबासदेखि काभ्रेपलान्चोकको धुलिखेलसम्म फैलिएको छ र यसलाई देशको एक प्रमुख लाइफलाइन मानिन्छ ।
कार्यक्रममा बोल्दै अर्थमन्त्री खनालले यो अनुदान सहायतालाई नेपाल र जापानबीचको गहिरो मित्रता र सहकार्यको महत्त्वपूर्ण प्रतीकका रूपमा व्याख्या गरे। उनले यस सहयोगले क्षतिग्रस्त राजमार्गको पुनर्निर्माणमा ठूलो मद्दत पुग्ने विश्वास व्यक्त गरे ।
जापानी राजदूत माएदाले आफ्नो मन्तव्यमा यो सहयोगले बीपी राजमार्गका क्षतिग्रस्त भागहरूको पुनर्स्थापना गरी नेपालको आर्थिक विकास र जनताको जीवनस्तर सुधारमा योगदान पुर्याउने बताए । उनले जापान नेपालको विकास यात्रामा सधैं एक भरपर्दो साझेदार रहेको दोहोर्याए ।
यो अनुदान सम्झौताले क्षतिग्रस्त बीपी राजमार्गको मर्मत तथा पुनर्निर्माणलाई तीव्रता दिने र यस क्षेत्रको यातायात तथा व्यापारिक गतिविधिमा सहजता ल्याउने अपेक्षा गरिएको छ ।
