काठमाडौँ । चालू आर्थिक वर्ष २०८२/८३ को पहिलो त्रैमास (साउन–असोज) मा नेपालको अन्तर्राष्ट्रिय व्यापार ५ खर्ब ४० अर्ब ८६ करोड रुपैयाँ पुगेको छ, जुन अघिल्लो आर्थिक वर्षको तुलनामा २६.०४ प्रतिशतले बढी हो । भन्सार विभागले सार्वजनिक गरेको पछिल्लो तथ्याङ्कले अर्थतन्त्रमा सकारात्मक सङ्केत देखाएको छ ।

गत आर्थिक वर्षको सोही अवधिमा ४ खर्ब २९ अर्ब १३ करोड रुपैयाँको मात्र अन्तर्राष्ट्रिय व्यापार भएको थियो । यस वर्षको पहिलो त्रैमासमा आयात र निर्यात दुवैमा उल्लेखनीय वृद्धि देखिएको छ, जसले समग्र व्यापार परिदृश्यलाई चलायमान बनाएको छ ।

आयातमा पनि वृद्धि:
असोज मसान्तसम्म ४ खर्ब ६८ अर्ब रुपैयाँ बराबरको वस्तु आयात भएको छ, जुन अघिल्लो वर्षको तुलनामा १९.७९ प्रतिशतले बढी हो । गत वर्ष असोजसम्म ३ खर्ब ९० अर्ब ७५ करोड रुपैयाँको वस्तु आयात भएको थियो । चाडपर्वको सिजन नजिकिँदै गर्दा उपभोग्य वस्तु, पेट्रोलियम पदार्थ र इलेक्ट्रोनिक सामानको माग बढ्नु आयात वृद्धिको प्रमुख कारण मानिएको छ ।