काठमाडौं । इजरायल र हमासबीच भएको युद्धविराम सम्झौताको पहिलो चरणअन्तर्गत सोमबार बन्धकहरूको रिहाइ प्रक्रिया सुरु हुने भएको छ । यसै क्रममा गाजा पट्टीमा हमासको नियन्त्रणमा रहेका २२ जना जीवित बन्धकको सूची सार्वजनिक भएको छ । यो सूचीमा नेपालका विपिन जोशीको नाम पनि समावेश भएको अन्तर्राष्ट्रिय सञ्चारमाध्यमहरूले जनाएका छन् ।

यसअघि सीएनएनले विपिनसहित दुई जनाको अवस्था अज्ञात रहेको समाचार प्रकाशित गरेको थियो । तर, अहिले टाइम्स अफ इजरायल, एपीसहितका प्रतिष्ठित सञ्चारमाध्यमले जारी गरेको २२ जना जीवित बन्धकहरूको सूचीमा विपिन जोशीको नाम स्पष्ट रूपमा उल्लेख गरिएको छ ।

शुक्रबार सम्पन्न युद्धविराम सम्झौतासँगै सोमबारदेखि मंगलबारसम्म बन्धकहरूको रिहाइ हुने अपेक्षा गरिएको छ । यसको बदलामा इजरायलले पनि दुई हजार प्यालेस्टिनी कैदीहरूलाई रिहा गर्ने तयारी गरेको छ । यसरी, विपिन जोशीसहितका २२ जना जीवित बन्धकहरूको सुरक्षित फिर्तीको सम्भावना बढेर गएको छ ।

जीवित ठानिएका बन्धकहरू यी हुन्:

• गाली बर्मन (Gali Berman)

• जिभ बर्मन (Ziv Berman)

• एलकाना बोहबोट (Elkana Bohbot)

• रोम ब्रास्लाभस्की (Rom Braslavski)

• निमरोड कोहेन (Nimrod Cohen)

• एरियल क्युनियो (Ariel Cunio)

• डेभिड क्युनियो (David Cunio)

• एभ्याटर डेभिड (Avyatar David)

• गाय गिल्बोआ-दलाल (Guy Gilboa-Dalal)

• म्याक्सिम हार्किन (Maxim Harkin)

• इटान हर्न (Eitan Horn)

• सेगेभ काल्फोन (Segev Kalfon)

• बार कुपर्श्टाइन (Bar Kupershtein)

• मातान आङ्ग्रेस्ट (Matan Angrest)

• ओम्री मिरान (Omri Miran)

• इटान मोर (Eitan Mor)

• तामिर निम्रोदी (Tamir Nimrodi)

• योसेफ-चैम ओहाना (Yosef-Chaim Ohana)

• एलोन ओहेल (Alon Ohel)

• अविनाटन ओर (Avinatan Or)

• विपिन जोशी (Bipin Joshi)

• मातान जंगाउकर (Matan Zangauker)

यो सूचीले विश्वभरि रहेका यी बन्धकका परिवारजनमा ठूलो राहत र खुसी ल्याएको छ । नेपाल सरकारले विपिन जोशीको सकुशल फिर्तीका लागि आवश्यक सबै कूटनीतिक पहल गरिरहेको छ । देशका नागरिकहरू विपिनको घर फिर्तीको कामना गरिरहेका छन् ।