काठमाडौं । हरेक वर्ष भदौ २२ गते मनाइने निजामती सेवा दिवस यस वर्ष कर्मचारीका लागि खल्लो महसुस भएको छ । सरकारले यस वर्ष निजामती सेवा दिवसको अवसरमा वितरण गरिने कुनै पनि पुरस्कारका लागि योग्य कर्मचारी नभेटिएको भन्दै नामावली सार्वजनिक गरेन । हरेक वर्ष एकजनालाई सर्वोत्कृष्ट, दश जनालाई उत्कृष्ट र तीस जनालाई निजामती पुरस्कार प्रदान गरिँदै आएको थियो ।
संघीय मामिला तथा सामान्य प्रशासन मन्त्रालयका प्रवक्ता कालीप्रसाद पराजुलीले यस वर्ष पुरस्कार घोषणा नगरिएको पुष्टि गरे पनि यसको कारणबारे भने केही बताउन चाहेनन् । नेपाल पुलिस क्लबमा जारी निजामती सेवा दिवस मूल समारोहमा मुख्य सचिव एकनारायण अर्यालले विगतमा जस्तै यस वर्ष पनि पुरस्कार पाउनेहरूको नामावली छिट्टै घोषणा गर्ने बताए, तर यसले अहिलेको अन्योललाई स्पष्ट पार्न सकेन ।
२०७३ सालयता २ लाख रुपैयाँ राशिको सर्वोत्कृष्ट निजामती सेवा पुरस्कार कसैलाई पनि प्रदान गरिएको छैन । तत्कालीन सचिव शान्तराज सुवेदीले उक्त पुरस्कार प्राप्त गरेयता सरकारले ‘सर्वोत्कृष्ट कर्मचारी नभेटिएको’ भन्दै यो पुरस्कार कसैलाई पनि दिएको छैन । यद्यपि, १ लाख रुपैयाँ राशिको उत्कृष्ट निजामती र ५० हजार रुपैयाँ राशिको निजामती पुरस्कार पाउने कर्मचारीहरूको नामावली भने हरेक वर्ष गोरखापत्र दैनिकमा सार्वजनिक हुने गरेको थियो । तर, यस पटक त्यो परम्परा पनि भङ्ग भएको छ ।
यस वर्ष पुरस्कार घोषणा नभए पनि, गत वर्ष घोषणा गरिएका पुरस्कारहरू भने आज वितरण गरिएको छ । उपप्रधानमन्त्री एवम् सहरी विकासमन्त्री प्रकाशमान सिंहको हातबाट पोहोरसाल छानिएका कर्मचारीहरूलाई पुरस्कार प्रदान गरियो । प्रधानमन्त्री केपी शर्मा ओली यस कार्यक्रममा सहभागी हुने भनिए पनि, उनी विधान महाधिवेशनमा व्यस्त रहेकाले उपप्रधानमन्त्री सिंह प्रमुख अतिथिको रूपमा उपस्थित थिए ।
यस वर्ष कुनै पनि कर्मचारी पुरस्कारका लागि योग्य नदेखिनुले निजामती सेवाको कार्यसम्पादनमाथि प्रश्नचिन्ह खडा गरेको छ भने कर्मचारीहरूमा थप मनोबल खस्कन सक्ने चिन्ता व्यक्त गरिएको छ ।
