काठमाडौं । अमेरिकामा गैरकानुनी रूपमा बसोबास गर्दै आएका ३७ नेपाली नागरिकलाई अमेरिकी सरकारले डिपोर्ट गरेको छ । उनीहरूलाई बुधबार चार्टर विमानमार्फत काठमाडौं ल्याइँदैछ । यो घटना डोनाल्ड ट्रम्पले दोस्रो कार्यकालका लागि राष्ट्रपति पद सम्हालेयता डिपोर्ट गरिएका नेपालीहरूको संख्या २०० नाघेको पछिल्लो उदाहरण हो ।

अध्यागमन विभागका महानिर्देशक रामचन्द्र तिवारीले अमेरिकी पक्षबाट चार्टर विमानमार्फत नेपाली नागरिकहरूलाई फिर्ता पठाउने जानकारी प्राप्त भएको पुष्टि गरे । प्राप्त जानकारी अनुसार, ‘उडान नम्बर एन८२८एएक्स’ को चार्टर विमानले बुधबार यी ३७ जनालाई नेपाल ल्याउनेछ ।

डिपोर्ट गरिएका नेपालीहरूको विस्तृत विवरण अध्यागमन विभागले सार्वजनिक नगरे पनि, यसअघि यसरी नै स्वदेश फर्काइएका नेपालीहरू देशका विभिन्न २८ जिल्लाका रहेको बताएको छ । डोनाल्ड ट्रम्प प्रशासनले अवैध आप्रवासीहरूलाई सुरुमा स्वेच्छिक रूपमा स्वदेश फर्कन अनुरोध गर्दै आएको छ ।

तर, उक्त अनुरोधलाई बेवास्ता गर्नेहरूलाई भने अमेरिकी अध्यागमन अधिकारीहरूले खोजीखोजी पक्राउ गरी डिपोर्ट गर्ने नीति अपनाएको छ । यो पछिल्लो डिपोर्ट सोही नीतिको निरन्तरता हो ।