काठमाडौं । ऊर्जा, जलस्रोत तथा सिँचाइमन्त्री दीपक खड्काले ऊर्जा क्षेत्रमा लगानीको वातावरण निर्माण गर्न सरकार प्रतिबद्ध रहेको बताएका छन् । आगामी मंसिर १ र २ गते धनगढीमा हुने ‘सुदूरपश्चिम प्रदेश लगानी तथा विकास सम्मेलन’ को पूर्वसन्ध्यामा आयोजित कार्यक्रममा बोल्दै मन्त्री खड्काले ऊर्जा क्षेत्रको विकासका लागि नीतिगत सुधारलाई उच्च प्राथमिकतामा राखिएको जानकारी दिए ।
उनले संविधान निर्माणपछि कानुन निर्माणको चरणमा रहेको उल्लेख गर्दै ऊर्जा क्षेत्रको विकासका लागि आवश्यक कानुनलाई तीव्र गतिमा अगाडि बढाउने प्रतिबद्धता व्यक्त गरे। मन्त्री खड्काले सङ्घीयतामा गएपछि प्रदेशहरूले आफ्नो सशक्तीकरणका लागि देखाएको चासो सकारात्मक रहेको बताउँदै निजी क्षेत्रसँगको सहकार्यमा आर्थिक विकासका लागि सरकार अगाडि बढेको स्पष्ट पारे।
“विकास निर्माणमा देखिएका कानुनी अड्चनहरूलाई समयसापेक्ष संशोधन गर्दै अगाडि बढेका छौँ,” मन्त्री खड्काले भने, “सङ्घ र प्रदेश सरकारद्वारा निर्मित कानुनहरूबीच तालमेल हुनु जरुरी छ।” उनले जलविद्युत् निर्माणमा वन र जग्गा प्राप्तिका समस्याहरूलाई समाधान गर्न तीनै तहका सरकारबीच समन्वय आवश्यक रहेकोमा जोड दिए।
मन्त्री खड्काले मुलुकमा उपलब्ध स्रोतसाधनको अधिकतम प्रयोग गर्दै समृद्ध नेपाल निर्माणमा सरकार क्रियाशील रहेको बताउँदै ऊर्जा मन्त्रालयले नीतिगत निर्णयहरू मार्फत यस क्षेत्रको विकासलाई गति दिन चाहेको उल्लेख गरे। विद्युत् क्षेत्रको विकासका लागि निजी क्षेत्रलाई उत्पादनसँगै प्रसारण लाइन निर्माण र विद्युत् खरिदबिक्रीसम्मको व्यवस्था मिलाउन लागिएको उनको भनाइ थियो।
सुदूरपश्चिमको सम्भावना: लगानी सम्मेलनको उद्देश्य
सुदूरपश्चिम प्रदेशका मुख्यमन्त्री कमलबहादुर शाहले प्रदेशको विकास र समृद्धिका लागि लगानी सम्मेलन आयोजना गर्न लागिएको बताउँदै सबैलाई यसमा जोडिन आग्रह गरे। “यो लगानी सम्मेलन केवल लगानीमा मात्र केन्द्रित नभई मुलुकलाई केही दिन सकिन्छ कि भन्ने भावनाका साथ आयोजना गरिएको हो,” मुख्यमन्त्री शाहले भने, “प्रदेशको विकास र रोजगारी सिर्जना गर्ने बाटोमा हामी इमान्दारपूर्वक लागिरहेका छौँ।” उनले सम्मेलनलाई सफल पार्न केन्द्र सरकारको साथ र सहयोग अपरिहार्य रहेकोमा जोड दिए।
सुदूरपश्चिम प्रदेशका प्रमुख सचिव डा. कमल पोखरेलले सुदूरपश्चिम सबै क्षेत्रमा प्रचुर सम्भावना बोकेको प्रदेश भएकाले उक्त स्रोतको समुचित प्रयोग गरी समृद्ध मुलुक निर्माणका लागि सम्मेलन आयोजना गरिएको जानकारी दिए। धनगढीको सिटी हलमा दुई दिनसम्म चल्ने सम्मेलनमा उद्घाटन सत्रका साथै विकास निर्माण, लगानीका सम्भावनाबारे विभिन्न बैठक र सम्झौता गरिने कार्यक्रम छ।
ऊर्जा क्षेत्रमा सुदूरपश्चिमको विशाल क्षमता
विद्युत् विकास विभागका महानिर्देशक जीवछ मण्डलले सुदूरपश्चिम प्रदेशमा हाल आठ हजार २४१ मेगावाटका १०८ जलविद्युत् आयोजना कुनै न कुनै रूपले अगाडि बढिरहेको जानकारी दिए। यसले प्रदेशको ऊर्जा उत्पादनको विशाल क्षमतालाई उजागर गर्छ।
छलफलमा सुदूरपश्चिम प्रदेशमा ऊर्जा क्षेत्रको विकास गरिरहेका कम्पनीहरूले प्रसारण लाइन, जग्गा प्राप्ति र वनलगायतका समस्याहरूका बारेमा जानकारी गराएका थिए। यी समस्याहरूलाई सम्बोधन गर्न र लगानीमैत्री वातावरण निर्माण गर्न सरकार प्रतिबद्ध रहेको सन्देश कार्यक्रममा दिइएको थियो। सुदूरपश्चिमको यो लगानी सम्मेलनले प्रदेशको समग्र विकासका साथै राष्ट्रिय अर्थतन्त्रमा समेत महत्वपूर्ण योगदान पुर्याउने अपेक्षा गरिएको छ।
