काठमाडौं । बजारमा रासायनिक मलको अभाव भएको भन्दै विभिन्न सञ्चारमाध्यम र सामाजिक सञ्जालमा समाचारहरु प्रकाशित भइरहेका बेला साल्ट ट्रेडिङ कर्पोरेशन लिमिटेडले १५ लाख २३ हजार बोरा रासायनिक मल भारतको कोलकत्ता बन्दरगाहमा आइपुगेको जनाएको छ । कर्पोरेशनले शुक्रबार एक विज्ञप्ति जारी गर्दै उक्त मल धमाधम नेपालस्थित गोदामहरुमा ल्याउने क्रम जारी रहेको स्पष्ट पारेको छ ।
कर्पोरेशनका अनुसार हालै आयात गरिएको मलमा ४ लाख ४० हजार बोरा युरिया र १० लाख ८३ हजार बोरा डीएपी रहेको छ । यो ठूलो परिमाणको आयातले मलको अभाव खेपिरहेका किसानहरुलाई राहत मिल्ने अपेक्षा गरिएको छ ।
विज्ञप्तिमा जनाइएअनुसार, गोदाममा आइपुगेको मलको व्यवस्थित वितरणका लागि प्रदेश सरकारहरुलाई पत्राचार गरिसकिएको छ । प्रदेश सरकारहरुले सम्बन्धित पालिकाहरुलाई आवश्यकताअनुसारको कोटा वितरण गरिसकेको जानकारी प्राप्त भएको कर्पोरेशनले उल्लेख गरेको छ । यससँगै, कर्पोरेशनले आफ्ना सम्पूर्ण डिलरहरुलाई सम्बन्धित पालिका र कर्पोरेशनको कार्यालयसँग समन्वय गरी तोकिएको कोटाअनुसारको मल बिक्री वितरण गर्न अनुरोध गरेको छ ।
पछिल्लो समय बजारमा मल अभाव भएको भन्ने समाचारप्रति आफ्नो ध्यानाकर्षण भएको जनाउँदै कर्पोरेशनले किसानहरुलाई अनावश्यक रुपमा चिन्तित नहुन र मलको सहज आपूर्तिका लागि कर्पोरेशन प्रतिबद्ध रहेको आश्वासन दिएको छ । आयात गरिएको मलको ढुवानी प्रक्रिया तीव्र गतिमा अघि बढिरहेकाले छिट्टै सबै क्षेत्रका किसानले सहज रुपमा मल पाउने कर्पोरेशनको दाबी छ ।
नेपालमा हरेक वर्ष खेतीको सिजनमा रासायनिक मलको अभाव हुने समस्या देखिने गरेको छ । समयमै मल आपूर्ति नहुँदा किसानहरुले बाली लगाउन नपाउने र उत्पादनमा ह्रास आउने जस्ता समस्या झेल्दै आएका छन् । यसपटकको यो आयातले किसानको समस्यालाई केही हदसम्म सम्बोधन गर्ने विश्वास लिइएको छ ।
