काठमाडौँ । एन आई सी एशिया बैंकले आफ्ना ग्राहकहरूलाई स्वास्थ्य उपचार सेवामा विशेष छुट उपलब्ध गराउन काठमाडौँको पुरानो बानेश्वरस्थित फ्रन्टलाइन हस्पिटलसँग सहकार्य गरेको छ। मंगलबार सम्पन्न एक सम्झौताअनुसार, अब एन आई सी एशिया बैंकका ग्राहकहरूले फ्रन्टलाइन हस्पिटलका विभिन्न सेवाहरूमा डिजिटल माध्यमबाट भुक्तानी गर्दा १० प्रतिशत छुट पाउने भएका छन्।

यो सुविधा प्राप्त गर्नका लागि बैंकका ग्राहकहरूले अस्पतालमा सेवा लिएपश्चात् बैंकको डेबिट कार्ड, क्रेडिट कार्ड, प्रिपेड कार्ड अथवा ‘मोबैंक’ (MoBank) एपमार्फत भुक्तानी गर्नुपर्नेछ।

उक्त सम्झौता पत्रमा एन आई सी एशिया बैंकका तर्फबाट डिजिटल पेमेन्ट इकोसिस्टम प्रमुख बिमल लम्साल र फ्रन्टलाइन हस्पिटलका तर्फबाट क्लिनिकल प्रेसिडेन्ट डा. योगेश न्यौपानेले हस्ताक्षर गरेका छन् । नोबल कलेज अफ हेल्थ एण्ड एजुकेसन फाउन्डेसनद्वारा सञ्चालित फ्रन्टलाइन हस्पिटलसँगको यो सहकार्यले बैंकका ग्राहकहरूलाई स्वास्थ्य उपचार खर्चमा केही राहत मिल्ने अपेक्षा गरिएको छ।

बैंकले जारी गरेको विज्ञप्तिमा जनाइएअनुसार, यस किसिमको सहकार्यले ग्राहकलाई प्रत्यक्ष लाभ पुऱ्याउनुका साथै मुलुकमा डिजिटल भुक्तानी प्रणाली र नगदरहित कारोबारलाई प्रवर्द्धन गर्न थप बल पुग्ने विश्वास लिइएको छ। पछिल्लो समय बैंक तथा वित्तीय संस्थाहरूले आफ्ना ग्राहकहरूलाई विभिन्न सेवा तथा वस्तुहरूको खरिदमा डिजिटल भुक्तानीमार्फत छुट र ‘क्यासब्याक’ जस्ता सुविधा प्रदान गर्न विभिन्न व्यापारिक प्रतिष्ठानहरूसँग सहकार्य गर्ने क्रम बढेको छ।