काठमाडौं – आफ्ना स्रोता तथा दर्शकमाझ गायिका जुनु गौतमले नयाँ कोसेली ‘यो माया’ प्रस्तुत गरेकी छन् । प्रेम र नृत्यको रमाइलो संयोजन रहेको यो गीत ओएसआर डिजिटलको युट्युब च्यानलमार्फत हालै सार्वजनिक गरिएको हो ।
सार्वजनिक भएसँगै गीतले छोटो समयमै दर्शकको मन जित्न सफल भएको छ । जीवन अधिकारीको शब्द तथा संगीतमा सजिएको यस गीतमा बिपिन आचार्यको संगीत संयोजन रहेको छ । गीतले प्रेमिल भावहरूलाई जीवन्त बनाउँदै जो कोहीलाई पनि छमछमी नचाउने नृत्यमय शैली बोकेको छ ।
गीतको भिडियोमा चर्चित रेस्लर अश्मिता जुरेली र मोडल क्रिस बमको आकर्षक अभिनय तथा नृत्य देख्न सकिन्छ । विशाल कैनीको निर्देशन तथा कोरियोग्राफीमा तयार भएको भिडियोले गीतको भावलाई थप उजिल्याएको छ ।
सार्वजनिक भएको केही दिनमै युट्युबमा १ लाख ३० हजारभन्दा बढी पटक हेरिइसकेको यो गीतले स्रोता तथा दर्शकबाट सकारात्मक प्रतिक्रिया पाइरहेको छ ।
गीतले पाएको सफलताबाट उत्साहित गायिका गौतमले आफ्ना अन्य सिर्जनाहरू पनि चाँडै बजारमा ल्याउने तयारी गरेकी छन् । ‘यो माया लाई दर्शकले दिनुभएको मायाले म निकै खुसी छु,’ उनले भनिन्, ‘अब मेरा आधा दर्जनभन्दा बढी गीतहरू सार्वजनिक हुने तयारीमा छन्, जसमा तीज गीत, भजनदेखि शास्त्रीय संगीतसम्मका स्वाद दर्शकले पाउनेछन् ।’
