काठमाडौं । एन आई सी एशिया बैंकले लिलामीमा राखिएका सम्पत्तिहरूको खरिद-बिक्री प्रक्रियालाई सहज, पारदर्शी र प्रविधिमैत्री बनाउन एक अत्याधुनिक अनलाइन पोर्टल सञ्चालनमा ल्याएको छ । अब बैंकको लिलामीमा रहेका घरजग्गा तथा अन्य सम्पत्ति खरिद गर्न चाहनेहरूले घरमै बसेर सम्पूर्ण विवरण हेर्न र सम्पत्तिको अवस्थाबारे जानकारी लिन सक्नेछन् ।

बैंकले सार्वजनिक गरेको auctionassistance.nicasiabank.com नामक पोर्टलले लिलामी प्रक्रियामा सर्वसाधारणको पहुँचलाई सरल बनाइदिएको छ । यसअघि लिलामीको सूचना पत्रिकामा हेर्ने, बैंकको शाखा कार्यालयमा पुगेर बुझ्ने र सम्पत्ति खोज्दै हिँड्नुपर्ने झन्झटलाई यो डिजिटल प्लेटफर्मले अन्त्य गर्ने अपेक्षा गरिएको छ ।

के-के छन् पोर्टलमा सुविधा?

यो अनलाइन पोर्टलमा बैंकको आफ्नो स्वामित्वमा रहेको गैर-बैंकिङ्ग सम्पत्तिदेखि धितोबापत राखिएका र लिलाम हुन लागेका सबै सम्पत्तिको सूची उपलब्ध छ । इच्छुक खरिदकर्ताले पोर्टलमा लग-इन गरी निम्न जानकारी सहजै प्राप्त गर्न सक्छन्:

• सम्पत्तिको पूर्ण विवरण: लिलामीमा राखिएको घर वा जग्गाको कित्ता नम्बर, क्षेत्रफल, र अन्य प्राविधिक विवरण ।

• फोटो तथा नक्सा: सम्पत्तिको हालको अवस्था देखाउने तस्बिर र आधिकारिक नक्सा ।

• गुगल म्याप लोकेसन: सबैभन्दा आकर्षक सुविधाको रूपमा रहेको गुगल म्याप इन्टिग्रेशनले खरिदकर्तालाई सम्पत्ति रहेको वास्तविक ठाउँसम्म पुग्न र त्यस क्षेत्रको अवलोकन गर्न मद्दत गर्छ ।

• सिधै सम्पर्कको सुविधा: यदि कुनै सम्पत्ति मन परेर थप जानकारी लिन चाहेमा, सोही सम्पत्तिको विवरणसँगै रहेको ‘म्यासेज बक्स’मा आफ्नो नाम, ठेगाना र सम्पर्क नम्बर राखी बैंकलाई सिधै सन्देश पठाउन सकिनेछ ।

बैंकका सहायक प्रमुख कार्यकारी अधिकृत (प्रमुख सूचना अधिकारी) अर्जुन राज खनियाका अनुसार, यो पोर्टल लिलामी प्रक्रियालाई व्यवस्थित बनाउने दिशामा एक महत्त्वपूर्ण कदम हो । “हामीले ग्राहकहरूको समय र मिहिनेत बचत गर्दै लिलामी प्रक्रियालाई थप पारदर्शी बनाउन यो पोर्टल सुरु गरेका हौँ,” उनले भने, “अब देशको कुनै पनि कुनामा रहेका इच्छुक व्यक्तिले सजिलै लिलामीका सम्पत्तिबारे जानकारी लिई खरिद प्रक्रियामा सहभागी हुन सक्नुहुनेछ ।”

बैंकले लिलामीसम्बन्धी सूचनाहरूमा समावेश गरिने क्युआर (QR) कोड स्क्यान गरेर पनि सिधै यो पोर्टलमा पुग्न सकिने व्यवस्था मिलाएको छ । बैंकमा धितो रहेका, बैंकिङ्ग तथा गैर-बैंकिङ्ग सम्पत्तिहरू नियमित रूपमा यस पोर्टलमा अद्यावधिक गरिने हुँदा यसले खरिदकर्ताका लागि एक विश्वसनीय र केन्द्रीकृत सूचनाको स्रोतको रूपमा काम गर्ने बैंकले विश्वास लिएको छ ।