काठमाडौ ।  संसदबाट विनियोजन विधेयक (बजेट) पारित गराउने निर्णायक दिनमा सत्ता गठबन्धनका शीर्ष नेताहरू अन्तिम रणनीति बनाउन भेला भएका छन् । प्रधानमन्त्रीको सरकारी निवास बालुवाटारमा उच्चस्तरीय बैठक बसिरहेको हो ।

प्रधानमन्त्री तथा नेकपा एमालेका अध्यक्ष केपी शर्मा ओलीको अध्यक्षतामा बसेको बैठकमा प्रमुख सत्ता साझेदार दल नेपाली कांग्रेसका सभापति शेरबहादुर देउवा, एमालेका वरिष्ठ उपाध्यक्ष ईश्वर पोखरेल, कांग्रेसका प्रभावशाली नेता कृष्णप्रसाद सिटौला लगायतका शीर्ष नेताहरू सहभागी छन् । त्यसैगरी, गठबन्धनमा आबद्ध अन्य दलहरूलाई समेत विश्वासमा लिँदै लोकतान्त्रिक समाजवादी पार्टी (लोसपा) का अध्यक्ष महन्थ ठाकुर, जनता समाजवादी पार्टी (जसपा) नेपालका अध्यक्ष अशोक राई, जनमत पार्टीका अध्यक्ष डा. सिके राउत र नागरिक उन्मुक्ति पार्टीकी अध्यक्ष रञ्जिता श्रेष्ठको पनि बैठकमा उपस्थिति रहेको छ ।

आज प्रतिनिधि सभामा आर्थिक वर्ष २०८१/८२ को बजेटमाथि मन्त्रालयगत छलफलका क्रममा उठेका प्रश्नहरूको मन्त्रीहरूले जवाफ दिने कार्यसूची छ । मन्त्रीहरूको जवाफ सकिएलगत्तै विनियोजन विधेयकलाई निर्णयार्थ प्रस्तुत गरी पारित गर्ने सरकारको तयारी छ ।

बजेटजस्तो महत्त्वपूर्ण विधेयकमा कुनै पनि तलमाथि नहोस् भनेर सत्ताको नेतृत्वकर्ता दल एमाले र प्रमुख घटक कांग्रेसले आफ्ना सांसदहरूलाई अनिवार्य उपस्थित हुन र बजेटको पक्षमा मतदान गर्न ‘ह्विप’ समेत जारी गरिसकेका छन् । संसदमा मतदान हुनुअघि बसेको यो बैठकलाई सत्ता गठबन्धनभित्र कुनै पनि किसिमको असमझदारी नरहेको र बजेट सहजै पारित हुने विश्वास दिलाउने प्रयासका रूपमा हेरिएको छ ।