काठमाडौं । नयाँबानेश्वरमा जारी शिक्षक आन्दोलनको समाचार संकलनका क्रममा प्राइम टेलिभिजनकी पत्रकार सविना कार्की घाइते भएकी छन् । सुरक्षाकर्मीले प्रहार गरेको पानीको फोहोर आँखामा लाग्दा कार्की घाइते भएकी हुन् । हाल उनको तिलगंगा आँखा अस्पतालमा उपचार भइरहेको छ ।
महिला पत्रकारमाथि पेशागत जिम्मेवारी निर्वाह गर्ने क्रममा भएको आक्रमणप्रति सञ्चारिका समूह नेपालले गहिरो दुःख र खेद व्यक्त गरेको छ । समूहले यस घटनालाई केवल एक महिला पत्रकारमाथिको आक्रमण मात्र नभई प्रेस स्वतन्त्रता, अभिव्यक्ति स्वतन्त्रता र महिला मानव अधिकारप्रतिको गम्भीर उल्लङ्घनको रूपमा समेत व्याख्या गरेको छ ।
सञ्चारिका समूह नेपालले पत्रकारहरूलाई फिल्डमा निडर र सुरक्षित वातावरणमा काम गर्न पाउनुपर्नेमा जोड दिएको छ । घाइते पत्रकार कार्कीको शीघ्र स्वास्थ्यलाभको कामना गर्दै समूहले सरकारसँग उनको उपचार, क्षतिपूर्ति र सुरक्षाको सुनिश्चितताको माग गरेको छ ।
सञ्चारिका समूह नेपालकी महासचिव राधा खनालद्वारा जारी विज्ञप्तिमा भनिएको छ, ‘आगामी दिनमा सबै पत्रकारहरू निर्धक्क भएर फील्डमा काम गर्न सकून् भन्ने वातावरण निर्माणका लागि सरकारले आवश्यक कदम चाल्नुपर्छ ।’
