काठमाडौं । देशको अग्रणी विकास बैंकमध्ये एक, मुक्तिनाथ विकास बैंक लिमिटेडले चालु आर्थिक वर्ष २०८१/८२ को चैत्र मसान्तसम्म आइपुग्दा उल्लेखनीय वित्तीय प्रगति हासिल गरेको छ । बैंकले सो अवधिमा रु. ६१ करोड ९५ लाख वितरणयोग्य मुनाफा आर्जन गर्न सफल भएको छ, जुन विगतको तुलनामा प्रभावशाली वृद्धि हो ।

यस मुनाफाका आधारमा बैंकले ८.७९ प्रतिशत लाभांश वितरण गर्न सक्ने वित्तीय क्षमता देखिएको छ । अझै असार मसान्तसम्मको बाँकी समयको आय-व्यय विश्लेषण गर्दा मुनाफा अझै बढ्ने प्रक्षेपण गरिएको छ, जसले गर्दा शेयरधनीहरूले अझ आकर्षक लाभांशको आशा गर्न सक्ने सम्भावना बलियो बनेको छ ।

बैंकको कर्जा लगानी समेत उल्लेखनीय रूपमा वृद्धि भएर रु. ९७ अर्ब १३ करोड पुगेको छ । यसका साथै बैंकले रु. ११३ अर्ब बराबरको निक्षेप संकलन गरेको छ, जुन ग्राहकहरूको विश्वास र बैंकको सेवा प्रभावकारिताको प्रमाण हो ।

मुक्तिनाथ विकास बैंकको वित्तीय प्रगति र मजबुत व्यवसायिक स्थिति शेयर बजारका लगानीकर्ताहरूका लागि सकारात्मक संकेत छ । वितरणयोग्य मुनाफामा भएको वृद्धि र लाभांश दिन सक्ने क्षमताले शेयरधनीहरूमा उत्साह थप्ने देखिन्छ । बैंकले दीर्घकालीन वित्तीय मजबुती र दिगोपनमा केन्द्रित रही व्यवसाय अघि बढाइरहेको उल्लेख गरेको छ ।

कर्जा प्रवाहको उचित व्यवस्थापन, जोखिम न्यूनीकरण नीति र आधुनिक प्रविधिको प्रयोगले बैंकले प्रतिस्पर्धी बजारमा बलियो उपस्थिति कायम राख्न सफल भएको छ । यही गतिले मुक्तिनाथ विकास बैंकको चालु आर्थिक वर्षको प्रदर्शन उत्साहजनक देखिएको छ ।