काठमाडौं । महाशिवरात्रिको अवसरमा पशुपतिनाथ मन्दिरमा साँझदेखि विशेष पूजाको व्यवस्था गरिएको छ । पशुपति क्षेत्र विकास कोषका परिषद सदस् एवं प्रचार-प्रचार उपसमितिका संयोजक राजकुमार खत्रीकाअनुसार साँझ ७ बजेदेखि महाशिवरात्रि विशेष पूजाको व्यवस्था गरिएको हो ।
भक्तजनहरूले विशेष पूजा गर्नका लागि १५,१०० रुपैयाँ तिर्नुपर्नेछ । यस व्यवस्थाले भक्तजनहरूलाई बिना लाइन १ घण्टाभित्र पूजा सम्पन्न गर्ने अवसर प्रदान गर्नेछ । विशेष पूजामा यसवर्ष पञ्चामृत पूजा मात्र राखिएको छ । अघिल्लो वर्ष उपलब्ध बालभोगसहित पञ्चामृत पूजा, रुद्राभिषेक, लघुरुद्राभिषेक, तथा पूरा भोगसहित पञ्चामृत विशेष पूजाका विकल्पहरू हटाइएको संयोजक खत्रीले बताए । १५ हजारभन्दा बढी रकमको विशेष पूजामा भक्तजनहरूले लाखबत्ती बाल्ने, रुद्राभिषेक गर्ने, हवन सम्पन्न गर्ने, सवा लाख बत्तीबाट आरती गर्ने, तथा पञ्चामृत पूजा गर्ने अवसर पाउनेछन् ।
विशेष पूजामा सहभागी हुनका लागि पशुपति क्षेत्रको पश्चिमपट्टि रहेको एसबीआई बैंकमा १५,१०० रुपैयाँको भौचर बुझाउनुपर्नेछ । यसवर्ष विशेष पूजामा केवल २०० भक्तजनलाई मात्र सहभागिता दिने निर्णय गरिएको छ । शिवरात्रिको साँझ ७ बजेदेखि विशेष पूजा सुरु हुनेछ। यसलाई चार प्रहरमा विभाजन गरिएको छ :-
- पहिलो प्रहर: साँझ ७:०० बजे
- दोस्रो प्रहर: राति ९:०० बजे
- तेस्रो प्रहर: राति १२:०० बजे
- चौथो प्रहर: बिहान ३:०० बजे
विशेष पूजाले भक्तजनहरूलाई शिव तत्व प्राप्त गर्न, सत्वगुण अभिवृद्धि गर्न, तथा ध्यान, प्रार्थना र पूजामा संलग्न हुन प्रेरित गर्ने विश्वास गरिएको छ । यसैकारण साँझदेखि विशेष पूजाको व्यवस्था मिलाइएको छ । महाशिवरात्रिमा भक्तजनहरूले अब डिजिटल वालेट तथा मोबाइल बैंकिङ सेवा प्रयोग गरी भेटी चढाउन सक्नेछन् । प्रचारप्रसार संयोजक खत्रीका अनुसार ई-सेवा लगायतका डिजिटल माध्यममार्फत भेटी चढाउने व्यवस्था मिलाइएको छ । यसले भक्तजनहरूलाई सहज रूपमा दर्शन तथा भेटी चढाउने अवसर प्रदान गर्नेछ ।
महाशिवरात्रिमा पाँच लाखभन्दा बढी भक्तजनले दर्शन गर्ने अनुमान गरिएको छ । भक्तजनहरूको सुविधाका लागि पशुपति परिसरमा प्लास्टिक निषेधित क्षेत्र घोषणा गरिएको छ । प्रवेश व्यवस्थापनका लागि :-
- बाहिरी प्रवेशद्वारमा चार लाइन
- पश्चिम तथा उत्तर ढोकामा तीन/तीन लाइन
- पूर्व तथा दक्षिण ढोकामा दुई/दुई लाइन रहनेछ।
मन्त्रालयस्तरीय मूल समारोह समिति गठन गरी दर्शन, सुरक्षा, आवास, भोजन तथा धार्मिक कार्यक्रम व्यवस्थापनका लागि विभिन्न उपसमितिहरू सक्रिय बनाइएका छन् । साथै, सफाइ, शौचालय, खानेपानी, तथा जुत्ताचप्पल राख्ने स्थानको उचित प्रबन्ध गरिएको छ । नागाबाबाहरूका लागि मन्दिर परिसरमा विशेष धुनीको व्यवस्था गरिएको छ ।
