काठमाडौं । सिटिजन्स बैंक इन्टरनेसनलले ग्राहकलाई लक्षित गर्दै सस्तो ब्याजदरमा नयाँ घर कर्जा योजना सार्वजनिक गरेको छ । बैंकले ७ वर्षसम्म स्थिर ७.९९ प्रतिशत वार्षिक ब्याजदरमा कर्जा उपलब्ध गराउने घोषणा गरेको हो ।
‘सपनाको घरलाई दिनुहोस् आकार, सिटिजन्स घर कर्जाले पार्नेछ सपना साकार’ भन्ने नाराका साथ सुरु गरिएको यो योजना अन्तर्गत, ७ वर्षसम्म ब्याजदर स्थिर रहनेछ । ७ वर्षपछिको लागि भने बैंकको प्रचलित औसत मासिक आधारदरमा १ प्रतिशत प्रिमियम थपेर ब्याजदर निर्धारण गरिनेछ ।
ग्राहकले आफ्नो सुविधाअनुसार नजिकको सिटिजन्स बैंक शाखाबाट यस योजनाको सेवा लिन सक्नेछन् । अधिकतम २ करोड रुपैयाँसम्म कर्जा उपलब्ध हुने यो योजनामा बैंकले निःशुल्क भिसा क्रेडिट कार्ड र सिटिजन्स फोनपे क्रेडिट कार्डसमेत प्रदान गर्नेछ । पहिलो वर्षको लागि लकर सेवामा ५० प्रतिशत छुटसमेत उपलब्ध गराइएको छ ।
यो योजना अन्तर्गत प्लट भूमि वा तयार घर खरिद गर्ने, घर निर्माण, मर्मत, नवीकरण, थप निर्माण, तथा घर वा फ्ल्याट परिवर्तनका लागि आर्थिक सहायता प्रदान गरिन्छ । बैंकले अधिकतम ५० लाखसम्मको कर्जा प्रदान गर्नेछ, जसको भुक्तानी अवधि २५ वर्षसम्मको हुनेछ ।
सिटिजन्स बैंकको यो कर्जा योजना स्वरोजगार नेपाली नागरिकलाई लक्षित गरिएको छ । ग्राहकले यो सुविधा लिनका लागि नियमित आम्दानी स्रोत भएको प्रमाणित गर्नुपर्नेछ । थप रूपमा, व्यवसाय सञ्चालन गरिरहेका व्यवसायीले पनि, कम्तीमा २ वर्ष पुरानो व्यवसायको आधारमा, कर्जा लिन सक्नेछन् ।
कर्जा लिनका लागि ऋणकर्ताले आफ्नो नाममा रहेको जमीन वा भवन धितो राख्नुपर्नेछ । ऋण लिने व्यक्तिको उमेर अन्तिम भुक्तानी समयमा न्यूनतम १८ वर्ष र अधिकतम ७५ वर्ष हुनुपर्नेछ । तेस्रो पक्षको बन्धक भने स्वीकार्य हुने छैन । सिटिजन्स बैंकको यो योजना आफ्नै घरको सपना देख्ने सबै नेपालीका लागि एक उत्कृष्ट अवसर बन्नेछ ।
