कांग्रेसले बोलायो केन्द्रीय कार्यसमितिको आकस्मिक बैठक

काठमाडौं । नेपाली कांग्रेसले आकस्मिक केन्द्रीय कार्यसमितिको बैठक आह्वान गरेको छ । बैठक सोमबार बिहान साढे १० बजे ललितपुरस्थित बीपी स्मृति भवनमा बस्ने गरी बोलाइएको हो ।

बैठकमा आइतबार दिवंगत भएका पूर्वसभामुख दमननाथ ढुङ्गानाप्रति श्रद्धाञ्जली व्यक्त गर्दै शोक प्रस्ताव पारित गरिने छ । केन्द्रीय कार्यालयका सचिव प्रकाश शर्माका अनुसार शोकको समयमा पार्टीले औपचारिक निर्णय गर्न बैठक बोलाएको हो ।

प्रचार विभाग प्रमुख मीन विश्वकर्माले काठमाडौँमा उपलब्ध केन्द्रीय कार्यसमितिका सभापति तथा पदाधिकारीहरूलाई अनिवार्य उपस्थित हुन आग्रह गरिएको जानकारी दिए । सभापति शेरबहादुर देउवा ढुङ्गानाको निधनपछि डडेलधुराबाट काठमाडौँ फर्किसकेका छन् ।