सिंगटी हाइड्रोको नाफा ११३ प्रतिशत बढ्यो

काठमाडौं । सिंगटी हाइड्रो इनर्जी लिमिटेडले चालू आर्थिक वर्षको पहिलो त्रैमासमा ११ करोड २५ लाख रुपैयाँ खुद नाफा आर्जन गरेको छ । यो गत वर्षको सोही अवधिको नाफा भन्दा ११३.०४ प्रतिशतको बढी हो ।

गत वर्षको यही समयमा कम्पनीले ५ करोड २८ लाख रुपैयाँ नाफा कमाएको थियो । कम्पनीको विद्युत् बिक्री आम्दानीमा सामान्य घटबढ देखिएको छ । अघिल्लो वर्ष २६ करोड ३२ लाख रुपैयाँ रहेको आम्दानी यस त्रैमासमा २६ करोड ३५ लाख रुपैयाँ कायम भएको छ ।

सिंगटीको वित्तीय खर्चमा भने ठूलो कमी आएको छ । अघिल्लो वर्ष १३ करोड ९० लाख रुपैयाँ रहेको खर्च घटेर ७ करोड ९९ लाख रुपैयाँमा सीमित भएको छ, जसले कम्पनीको नाफामा सुधार ल्याउन मद्दत गरेको छ ।

२ अर्ब ९० करोड रुपैयाँ चुक्ता पूँजी रहेको सिंगटीको सेयर प्रिमियममा २५ करोड ११ लाख रुपैयाँ संचित छ, भने हालसम्मको एकुमुलेटेड घाटा १८ करोड ७० लाख रुपैयाँ छ । कम्पनीको प्रतिसेयर आम्दानी ३.८८ रुपैयाँ र प्रतिसेयर नेटवर्थ १०२.२१ रुपैयाँ रहेको छ ।