साँझ ‘हामीलाई सुरक्षा दिनुस्’ भन्दै घर छिरेकाले मध्यराती हतियार देखाएर सर्वस्व लुटेर लगे

हतियार देखाएर लुटेः सुवेदी
छोटो दिन, रात परिसकेको थियो । तीनजना केटा हस्याङफस्याङ गर्दै दौडिएर आए । घरमा बूढी आमा, पाहुना बहिनी–ज्वाइँ, भुराभुरी सबै थियौँ।

साँझका वेला ज्यान जोगाइदिनुपर्यो भन्दै आएपछि हामीले पनि नाइनास्ती गरेनौँ । उनीहरूले ‘दस बजेसम्म बसेर निस्कन्छौँ’ भने । बेलुकी खाना पकाएर दियौँ । एकजनाले खाना खाए । हामी सबै एउटै कोठामा बसेर गफ गर्र्दै थियौँ। वरपर सबै चकमन्न भइसकेको थियो । उनीहरूले चक्कु, हथौठालगायत हतियार देखाए । हामी एकाएक अचम्मित भयौँ।

तीमध्ये २ जना मंगोलियन र १ जना आर्य समुदायका जस्ता थिए । ‘तिमीहरूसँग नगद पाँच लाख छ, त्यही लिन आएका,’ भने । मसँग जम्मा २ लाख थियो । मैले, ‘दुई लाख छ,’ भनेँ। उनीहरूले, ‘जसरी पनि पाँच लाख पुर्याएर लैजाने हो, केके छ निकाल,’ भने । त्यसपछि घरमा भएको गरगहना, बहिनी ज्वाइसँग भएको गहना पनि लुटे । साथमा रहेका चारवटा मोबाइल पनि लुटेर लगे । मोटरसाइकल पनि लगे । राति दुई बजे हामीलाई भित्र थुनेर निस्के।