सहकारी ठगीसम्बन्धी संसदीय समितिको प्रतिवेदनमा सबैले गरे हस्ताक्षर

काठमाडौं । सहकारी ठगीसम्बन्धी संसदीय छानबिन विशेष समितिले तयार पारेको प्रतिवेदनमा हस्ताक्षर भएको छ । तीन महिना अघि संसद‍्बाट गठन भएको समितिले तयार गरेको प्रतिवेदनलाई अन्तिमरूप दिएसँगै हस्ताक्षर भएको हो ।

समितिका सातैजना सदस्यले हस्ताक्षर गरेका छन् । आइतबार नै लगभग प्रतिवेदन तयार भएको भनिएको थियो र सोमबार फस्ट आवरमै हस्ताक्षर गर्ने तयारी थियो । समितिका सदस्यहरू १० बजे नै सिंहदरबारस्थिति समितिको सचिवालयमा आएका थिए । तर, अन्तिम रुप दिने क्रममा मतभेद भएको थियो ।

सोमबार बसेको बैठकबाट हस्ताक्षर भएसँगै प्रतिवेदन प्रतिनिधिसभा बैठकमा पेस हुनेछ । समितिले प्रतिवेदन तयार पार्न कार्यक्षेत्र (टीओआर)मा उल्लेख गरिएका २९ सहकारीका पदाधिकारीसहित सम्बन्धित निकायसँग छलफल र स्थलगत अध्ययन समेत गरेको थियो ।