जडीबुटीको गेष्ट हाउसमा बसेका थिए अदालतबाट तकडीसहित भागेका खड्का

काठमाडौं । काठमाडौं जिल्ला अदालतबाट हतकडीसहित भागेका ठगीका आरोपी गेष्ट हाउसबाट पक्राउ परेका छन् । बुधबार अदालतबाट भागेका सिन्धुपाल्चोकको बाह्रबिसे २ का ३२ वर्षीय कमल खड्का आज बिहान जडीबुटीस्थित न्युदोलखाली गेष्ट हाउसबाट पक्राउ परेका हुन् ।

भक्तपुरको दुवाकोट बस्दै आएका उनलाई थुनछेक बहस गराउन प्रहरी वृत्त महाराजगन्जका प्रहरी वरिष्ठ हवल्दार इन्द्रबहादुर सिंजालीले अदालत लगेका थिए । त्यसक्रममा बुधबार दिउँसो साढे १ बजे उनी अदालत परिसरबाट हतकडीसहित भागेका थिए । उनको खोजीका लागि वृत्त प्रमुख अमरबहादुर थापा क्षेत्री र प्रहरी परिसरको संयुक्त टोली परिचालन भएको थियो ।

गेष्ट हाउसमा बसिरहेको अवस्थामा प्रहरीले खड्कालाई फेला पारेको हो । खड्काले लगाएको हतकडी र थुनुवा ज्याकेट दुवाकोटमा रहेको उनको कोठाको डस्टबिनमा भेटिएको थियो । सस्तोमा डलर साट्ने भन्दै उनले ठगी गरेको आरोपमा प्रहरीले उनलाई नियन्त्रणमा लिएको हो ।