रूकुम पश्चिममा जीप दुर्घटना, २२ घाइते, ५ को अवस्था गम्भीर

काठमाडौँ । रुकुम पश्चिममा जिप दुर्घटना भएको छ । दुर्घटनामा २२ जना यात्रु घाइते भएको र ती मध्ये ५ को अवस्था गम्भीर रहेको प्रहरीले जनाएको छ ।

सोमबार बिहान चौरजहारी नगरपालिकाको खोलागाउँदेखि सदरमुकाम मुसिकोट खलंगातर्फ जाँदै गरेको लु१ज २२९७ नम्बरको जिप मध्यपहाडी लोकमार्ग अन्तर्गत चौरजहारी नगरपालिका–८ गैरीजिउला भन्ने स्थानमा दुर्घटना भएको हो । जिप सडकबाट करिब २५० मिटर तल भेरी नदी किनारमा खसेको छ ।

घाइतेहरुलाई उद्धार गरी चौरजहारीको मिसन अस्पतालमा लगिएको छ । ‘२२ जना घाइतेलाई अस्पताल पुर्याइसकिएको छ, उद्धार कार्य अहिले पनि जारी छ,’ प्रहरीले भनेको छ ।