काठमाडौँ । प्रधानमन्त्री पुष्पकमल दाहाल ‘प्रचण्ड’ले संसद्को अवरोध खुलाउन प्रतिपक्ष दलसँग पहल गर्ने बताएका छन् । शुक्रबार बिहान प्रधानमन्त्री निवास बालुवाटारमा सभामुख देवराज घिमिरेसँगको भेटमा प्रधानमन्त्री दाहालले सदनको अवरोध खुलाउन भूमिका खेल्ने बताएका हुन् ।

भेटमा सभामुखले आफूले सदन खुलाउन नसकेको बताएका थिए । ‘सभामुखको रूपमा मैले सहमतिका लागि जिम्मेवारीपूर्वक पहल गरेको छु’, उनले प्रधानमन्त्रीलाई भने, ‘तर, परिणाममा निस्किन सकेन। शीर्ष नेताहरू नै घण्टौँ बस्दा पनि सहमति भएन ।’

त्यसपछि प्रधानमन्त्री प्रचण्डले आफूले सदन खुलाउन पहलकदमी लिने बताए । ‘म पनि सदन खुलाउन भूमिका खेल्छु । तपाईँ पनि लाग्नुहोस् । छिट्टै सहमति गर्नैपर्छ,’ उनले अगाडि भने, ‘म प्रमुख विपक्षी दलको नेतासँग थप पहल गर्छु ।’

गत साउन १० गतेदेखि अवरुद्ध संघीय संसद् खुलाउने पहलले अझै मूर्त रूप लिन सकेको छैन । राष्ट्रपति रामचन्द्र पौडेलले समेत चासो लिएर सदन खुलाउन सरकारको नेतृत्वदेखि प्रतिपक्षी नेतासम्म छलफल गरिरहेका छन् । यसबिच प्रधानमन्त्री-सभामुख भेटवार्ता भएको हो ।